Франциянинг Альп тоғларида ҳалокатга учраган Airbus А320 самолётининг иккинчи учувчиси ўтган рейс давомида бир неча дақиқа баландликни пасайтириш манёврини амалга оширган. Экспертлар фикрича, бунга ҳеч қандай сабаб бўлмаган, деб ёзади Meduza.
Ҳалокат терговига яқин бўлган манбалар хабарига кўра, Любиц А320 қулаган куни амалга оширилган Дюссельдорф—Барселона рейси чоғида самолётни ерга йўналтиришни «машқ қилган».
Эслатиб ўтамиз, 24 март куни Франция жанубида, Ницадан шимолроқдаги Дин-ле-Бен манзилгоҳида Germanwings авиакомпаниясининг Барселонадан Дюссельдорфга парвоз қилаётган Airbus А320 лайнери ҳалокатга учраган эди.
А320нинг иккинчи «қора қутиси» маълумотлари иккинчи учувчи Андреас Любиц самолётни қасддан ер томон йўналтиргани кўрсатди.
Кейинроқ маълум бўлдики, Любиц кабинага кириш эшигини қулфлаган, қулф паролини эса ўзгартирган ва, катта эҳтимол билан, самолёт автопилотини эркин қулаш режимига созлаб қўйган.
Бироқ учувчи ўз хатти-ҳаракатларини олдиндан режалаштирганини тасдиқловчи далиллар йўқ эди. Агар ўтган рейсда пастлашни машқ қилгани ҳақидаги маълумот тасдиқланса, Любицга нисбатан айблов қайта кўриб чиқилади.
Изоҳ (0)