Дунёдаги энг баланд турар-жой биносидан 550 парашютчи сакради (видео)
Американинг Dream Walker жамоаси иштирокчилари бошқа профессионал спортчилар билан биргаликда дунёдаги энг баланд турар-жой иншооти ҳисобланган Дубайдаги Princess Tower осмонўпар биносидан оммавий равишда сакрашни амалга оширди. Жамоанинг Facebook’даги саҳифасида бинодан 80 соат давомида 558 киши сакрагани қайд этилган.
Дубайнинг SkydiveDubai ва XDubai компаниялари ҳамкорлигида ташкиллаштирилган бу тадбирда воқеа иштирокчилари тиззабанд, тирсакбанд ва бош кийимни ҳам ўз ичига олган махсус кийим-бош кийишди. Портатив видеокамералар ёрдамида тайёргарлик ва сакраш жараёни тўлиқ суратга олинди.
YouTube тармоғига 28 апрелда жойланган якуний видеоролик миллион мартадан ортиқ томоша қилинди.
https://youtu.be/Fhskvloj1gE
Дубай Марина туманидаги одам яшаши учун мўлжалланган дунёдаги энг баланд Princess Tower биноси 101 қаватдан иборат ва 763 та хонадонни ўз ичига олади. Бундан ташқари, узунлиги 414 метрни ташкил қиладиган иншоотнинг 957 та машинага мўлжалланган ерости автотураргоҳи бор. Бинони қуриш ишлари 2012 йилда якунланган.
