АҚШнинг Нью-Йорк шаҳридаги муҳташам Madison Square Garden аренасида орзиқиб кутилган профессионал бокс жанги якунланди. Унда супероғир вазн тоифасининг WBA (Super), WBO ҳамда IBF йўналишларида амалдаги жаҳон чемпиони украиналик 39 ёшли Владимир Кличко америкалик 30 ёшли даъвогар Брайант Женнингсга қарши рингга кўтарилди, деб хабар беради «Olamsport.com».
Жанг тўлалигича 12 раунд давом этди. Кличколарнинг кичиги Женнингсга нисбатан аниқроқ ҳаракат қилди ва зарбалари ҳам шунга яраша ўз манзилига аниқ етиб борди. Якунда ҳакамлар икки бор 116-111 ва 118-109 ҳисобида ғалабани амалдаги жаҳон чемпионига тақдим этди.
Таъкидлаш жоиз, Владимир Кличко 9 йилдан бери супероғир вазн тоифасида жаҳон чемпиони бўлиб келмоқда. Бу борада у биргина афсонавий Жо Луисдан ортда қоляпти. Луис ўз вақтида 11 йил-у 8 ой мобайнида чемпионлик камарини ўзида сақлаб турган.
Шу тариқа, Владимир ўз унвонини 18 бор ҳимоя қилди. Таққослаш учун, Ларри Холмс 20, Жо Луис эса 25 марта чемпионлик камарларини ҳимоя қилган.
Изоҳ (0)