Малайзиялик криминалистлар Донбассдаги Boeing ҳалокати жойида иш бошлайди

Малайзиялик криминалистика мутахассислари Boeing-777 ҳалокатга учраган жойда қолган ашёвий далилларни иложи борича кўпроқ йиғиб олиш мақсадида Донецкда «камида 2—3 ҳафта» қолмоқчи. Бу ҳақда «Донецк халқ республикаси»га етиб келган малайзиялик экспертлар гуруҳи раҳбари Ҳусайн Умар Хонга таяниб, ТАСС хабар берди.

Малайзия вакили айтишича, улар олдига қўйилган вазифалар жумласига ҳалокат қурбонлари мурдаларини, шунингдек ҳодиса билан боғлиқ ашёвий далилларни топиш киради. Ушбу операцияда Нидерландия ва Украина мутахассислари ҳам қатнашади.

Ўз навбатида ДХР Халқ Кенгаши вице-спикери Денис Пушилин ДХР ҳукумати малайзиялик экспертлар ниятидан бохабар эканлиги ва уларни барча зарур нарсалар билан таъминлашга ҳаракат қилишини айтди.