Буюк Британиянинг энг кекса фуқароси Этель Ланг 114 ёшида вафот этди, дея хабар бермоқда ТАСС.
1900 йилда шахтёр оиласида туғилган Этель Ланг ўз умри давомида олти нафар Британия монархлари ва 22 нафар бош вазирни кўрди. У 2013 йилда лондонлик 113 ёшли Грейс Жонс вафотидан сўнг мамлакатдаги энг кекса фуқарога айланган эди.
Этель 13 ёшида мактабни тарк этиб, Барнсли шаҳридаги кўйлак ишлаб чиқариш заводига ишга кирган. 1922 йилда турмушга чиққан ва бир қизли бўлган. 1988 йилда эридан бева қолгач, Ланг хоним 103 ёшигача ёлғиз яшаган. Ҳаётининг сўнгги йилларини у қариялар уйида ўтказган. Унинг қизи ҳозирда 89 ёшда.
Узоқ умр кўрган ушбу аёл ҳеч қачон чекмаган, спиртли ичимликларни камдан-кам истеъмол қилган. У доимо соғлом овқатланиш тарафдори бўлган. Бундан ташқари, унинг аждодлари ҳам узоқ умр кўриб келган.
Изоҳ (0)