Россия президенти Владимир Путин тобольсклик мактаб ўқувчиси Екатеринага «Зумрад» лақабли лабрадор-ретривер зотидаги кучук боласини ҳадя этди, дея хабар бермоқда «Газета.ru».

13 ёшли қизалоққа совғани Тобольск маъмурияти раҳбари Владимир Мазур топширди. «Мен аввалига мактубимни Қорбобога жўнатмоқчи эдим, бироқ у мавжуд эмаслиги учун Владимир Владимировичга йўлладим», — деди Екатерина.

Қиз Путинга ноябрь ўрталарида юборган хатида «яхши» ва «аъло» баҳоларга ўқишини, ҳайвонларни севишини ҳамда лабрадор боқишни жуда ҳам исташини ёзган эди. Екатерина орзуси амалга ошганидан қувониб, президентга миннатдорлик билдирди.