21 ноябрь, жума куни Украина Олий Радасида «Пётр Порошенко блоки», «Халқ фронти», Олег Ляшконинг Радикал партияси, «Ўз-ўзига ёрдам» ва «Баткившчина» партиялари вакиллари коалиция шартномасини имзолади, дея хабар бермоқда «Корреспондент.net».
Ушбу партиялар фракциялари тузилиб, янги парламент биринчи мажлиси ўтказилаётган вақтда коалиция битимини расмий имзолаш маросими ўтказилади.
Янги Олий Раданинг биринчи мажлисига тайёргарлик кўриш бўйича гуруҳ раҳбари Владимир Гройсман айтишича, коалиция шартномаси Олий Рада фаолиятининг илк кунларидаёқ ҳукуматнинг янги таркибини шакллантириш имконини беради.
«Халқ фронти» етакчиси, Украина бош вазири Арсений Яценюк ушбу битим ислоҳотлар ўтказиш учун базавий ҳужжат бўлиб хизмат қилишини таъкидлади.
Олий Раданинг биринчи мажлиси 27 ноябрь куни бўлиб ўтиши кутилмоқда.
Изоҳ (0)