Тошкент шаҳридаги «Ўзэкспомарказ»да Sport World Uzbekistan — 2014 ва «Болалик дунёси — 2014» халқаро кўргазмалари иш бошлади, деб хабар бермоқда Ўзбекистон Миллий ахборот агентлиги.
Кўргазмалар «Соғлом бола йили» Давлат дастури ижроси доирасида Ўзбекистон Республикаси Ташқи иқтисодий алоқалар, инвестициялар ва савдо вазирлиги, Халқ таълими вазирлиги, Ўзбекистон Миллий Олимпия қўмитаси, Болалар спортини ривожлантириш жамғармаси кўмагида «Ўзэкспомарказ» миллий кўргазмалар мажмуи томонидан ташкил этилди.
«Болалик дунёси — 2014» кўргазмасида болалар ва ўсмирлар учун турли товарлар — болалар адабиёти, ўйинчоқлар, ақлни чархлайдиган ўйинлар, санитария-гигиена воситалари, кийим ва поябзал маҳсулотлари омма эътиборига ҳавола қилинган.
Кўргазманинг йирик бўлимларидан бири — «Болалар адабиёти» бўлимида «Ўзбекистон», «Ўқитувчи», Ғафур Ғулом номидаги, Чўлпон номидаги нашриётларда чоп этилган кенг турдаги болалар, ўқув ва уқув-услубий адабиётлар намойиш этилмоқда.
«Оригинал Люкс Сервис» ва «Гарант мебель» компаниялари кенг турдаги болалар мебелларини тақдим этмоқда. Болалар ўйинчоқлари ва ақлни чархлайдиган ўйинлар ишлаб чиқарадиган Toys-Plast, «Авраназеб» ва Optima Best Plast масъулияти чекланган жамиятлари стенди катта ёшлиларни ҳам беэътибор қолдирмаяпти.
Uztex қўшма корхонаси ва Tailor Impex МЧЖ, шунингдек, «Ўзбекенгилсаноат» давлат акциядорлик компанияси таркибидаги қатор корхоналар болалар учун мўлжалланган кенг турдаги кийимларни намойиш этмоқда.
Шунингдек, шу кунларда «Ўзэкспомарказ» миллий кўргазмалар мажмуи томонидан ташкил этилган Sport World Uzbekistan — 2014 халқаро кўргазмаси ҳам бўлиб ўтмоқда.