Ўзбекистон озиқ-овқат муаммосини ҳал этиш учун пахта экин майдонларини 2 марта қисқартирди, дея хабар бермоқда иқтисодиёт вазирлиги матбуот хизмати.
Ўзбекистон қишлоқ хўжалиги экинларининг деярли барча асосий турларини етиштириш учун ажойиб табиий-иқлим шароитларига эга. Республикамизда етиштирилаётган мева-сабзавот маҳсулотлари ажойиб таъм ва истеъмол хусусиятларига эга бўлиб, у қадимдан бутун жаҳонга машҳур, деб ёзади вазирлик.
Ўзбекистон мустақилликни қўлга киритиши билан қисқа муддатларда мамлакатнинг ғалла ва умуман озиқ-овқат мустақиллигига эришиш, аҳолини ўзимизда ишлаб чиқарилган асосий озиқ-овқат маҳсулотлари билан таъминлаш стратегик мақсади қўйилди.
Озиқ-овқат муаммосини ҳал этиш учун пахта экин майдонлари 2 марта қисқартирилди, бўшатилган майдонларда эса озиқ-овқат экинлари, шу жумладан, ғалла, мева-сабзавот, картошка, узум, полиз ва озуқа экинлари етиштирила бошлади.
Натижада мустақиллик йилларида ғалла экинлари етиштириш 1 миллион тоннадан 8 миллион тоннагача, мева-сабзавот маҳсулотлари етиштириш 4 миллион тоннадан 16 миллион тоннагача ошди. Қишлоқ хўжалиги ялпи маҳсулоти умумий ҳажмида пахтанинг улуши ҳозирги вақтда 9 фоиздан ошмагани ҳолида, бунда ғалла экинлари улуши 8,5 фоизни, мева-сабзавот экинлари ва узумнинг улуши 30 фоизни, картошка 11 фоизни, чорвачилик маҳсулотлари 40 фоиздан кўпни ташкил қилмоқда.
Изоҳ (0)