Референдум натижаларига кўра Шотландия Буюк Британия таркибида қоладиган бўлди

Шотландиядаги референдумда мамлакатнинг Буюк Британиядан ажралиб чиқишига қарши томон энг кўп овоз тўплади, дея хабар бермоқда ИТАР-ТАСС.

Бу Шотландия шарқидаги Файф округи натижалари эълон қилинганида маълум бўлган эди. У ерда мустақилликка қарши томон вакиллари ғолиб чиққан.

BBC телеканали хабарига кўра, яна иккита сайлов округида натижалар эълон қилинганича йўқ, бироқ улар референдумнинг умумий якунларини ўзгартира олмайди: мустақиллик тарафдорлари мағлуб бўлди.

Саноқ комиссияси Эдинбургда яқин соатлар ичида референдум якунлари ҳақидаги расмий баёнотни бериши кутилмоқда.

Шотландия ҳукуматининг биринчи вазири ва Шотландия миллий партияси етакчиси Алекс Салмонд мустақиллик тарафдорлари мағлубиятини тан олди. «Мустақилликни ёқлаб 1,6 миллион шотландиялик овоз берди, бироқ бу етарли бўлмади», — деди у.

Салмонд шунингдек расмий Лондон Шотландия ҳукуматининг ваколатини кенгайтириш ҳақида берган ваъдасини бажаришига умид билдирди.

Ўз навбатида Буюк Британия бош вазири Девид Кемерон Шотландия мустақиллигига қарши тарғибот кампанияси — «Биргаликда яхшироқ» етакчиси Алистер Дарлингни референдумда «яхши ишлагани» билан табриклади.