Италия бош вазири Маттео Ренци Ice Bucket Challenge («Бир челак муздек сув синови») акциясида иштирок этди, дея хабар берди Huffington Post нашрининг итальянча версияси. Ҳукумат раҳбарига бирйўла бир неча киши, жумладан таниқли италиялик қўшиқчилар Жованотти ва Тициано Ферро чақириқ йўллаган эди.
Ренци эса ўз навбатида баъзи дўстлари, шунингдек газета, журнал ва телевизион янгиликлар муҳаррирларига муздек сувда чўмилишни таклиф қилди.
Ice Bucket Challenge флешмобининг мақсади ён амиотрофик склероз деб номланган марказий асаб тизими касаллиги ҳақида хабардорликни оширишдан иборатдир. Хайрия кампаниясини қўллаб-қувватламоқчи бўлган кишилар ўз устидан совуқ сув қуйиши ва буни акс эттирувчи видеоёзувни интернетга жойлаши керак. Шундан сўнг улар ўз дўстлари, ҳамкасблари ва шунчаки танишларига бундай чақирувни йўллайди: агар улар 24 соат ичида муздек сувда чўмилмаса, кампания ташаббускори бўлмиш ALS Association фонди ҳисобига 100 доллар ҳажмида хайрия қилиши керак бўлади. Агар чақириқни қабул қилишса, 10 доллар миқдоридаги тўлов билан чекланиш мумкин.
Шарко касаллиги ёки Лу Гериг касаллиги сифатида ҳам танилган ён амиотрофик склероз қўл-оёқлар фалажлиги ва мускулларнинг қуриши билан кечади. Хасталик ўлимга олиб келиши мумкин, беморлар нафас йўллари инфекцияларидан ёки нафас олиш мускуллари ишламай қолишидан вафот этиши мумкин.
Изоҳ (0)