Apple компанияси яқиндагина 70–80 миллион дона iPhone 6 смартфонларини ишлаб чиқаришни буюртма қилгани ҳақида миш-миш эълон қилинган эди.
Phonearena.com сайтининг маълумотига асосланиб «Пароль» нашрининг хабар беришича, бунинг натижасида iPhone’га рақиб смартфонларнинг нархи 5 фоиздан 10 фоизгача ошиши мумкин. Чунки смартфон ишлаб чиқариш билан шуғулланувчи компаниялар катта ҳажмда iPhone 6 тайёрлашга сафарбар қилинган бўлса, бошқа смартфонларнинг ишлаб чиқарилиши сусаяди. Бу эса талаб бор пайтда таклифнинг камайишини, шунинг учун маҳсулот нархи кўтарилишини билдиради.
Масалан, Apple компанияси маҳсулотларини энг катта ишлаб чиқарувчиси – Foxconn компанияси iPhone’дан ташқари Nokia, Motorola, Microsoft, Sony, BlackBerry каби компанияларнинг смартфонларини ҳам ишлаб чиқариш билан шуғулланади. Apple’нинг рекорд даражада iPhone 6 ишлаб чиқаришни буюртма қилиши эса бошқа смартфонларнинг ишлаб чиқарилишини камайтиради.
Кузда iPhone 6 тақдимоти бўлиши кутилмоқда. Шунингдек, iPhone 6 билан бир мавсумда Sony Experia Z3, Samsung Galaxy Alpha, BlackBerry Passport смартфонларининг тақдимоти ҳам бўлиши режалаштирилган.
Қизиқ, Apple’нинг катта ҳажмдаги буюртмаси бошқа смартфонлар нархига қандай таъсир кўрсатар экан :)
Изоҳ (0)