21 июль куни App Store дўконида iPhone ва iPad учун Telegram HD мессенжерининг янги дастури пайдо бўлди. Худди шу вақтда клиентнинг расмий сайтидан Telegram iOS-дастури линки олиб ташланди. Бу ҳақда «Цукерберг позвонит» нашри хабар берди.
Павел Дуровнинг мессенжери расмий сайтидаги барча линклар энди Telegram HD дастурига олиб боради. Дастурни App Store’га 21 июль куни Telegram Messenger LLP компанияси юклаб қўйган. Таърифланишича, дастур iPad учун мослаштирилган, унда фото ва видео юкланиши яхшиланган, гиф формати пайдо бўлган ҳамда саломлашув экрани янгиланган.
Android учун дастур линки эса ўзгармаган, бироқ 5 апрель куни Google Play’да юридик шахс Telegram LLC’дан Telegram Messenger LLP’га алмаштирилган.
Нашрнинг таъкидлашича, дастур юридик шахсининг ўзгартирилишига «ВКонтакте» асосчиси Павел Дуров ва UCP фонди ўртасидаги акциядорлик низоси сабаб бўлган бўлиши мумкин.
Апрель ойида «ВКонтакте» ижтимоий тармоғи акцияларининг 48 фоизига эгалик қилувчи UCP жамғармаси Виргиния оролларидаги судга даъво аризаси топширди. У ижтимоий тармоқ бош директори Павел Дуров ва «ВКонтакте» акцияларининг 52 фоизи соҳиби – Mail.ru Group устидан даъво қилган.
Жамғарманинг фикрича, Дуров ўз хизмат ваколатларидан фойдаланган ҳолда Telegram’ни яратган, аммо уни «ВКонтакте» доирасида ишга тушириш ўрнига, ўзи эгалик қилган. UCP шу асосда Telegram’да ижтимоий тармоқнинг ҳуқуқи мавжудлиги тан олинишини талаб қилмоқда.
Изоҳ (0)