«Ангрен Шакар» масъулияти чекланган жамият хусусий корхонасининг таъсисчилари бўлмиш сингапурлик ва австриялик инвесторлар 108,45 миллион долларлик ушбу шакар заводини сентябрь ойида ишга туширмоқчи. Бу ҳақда Trend.az хабар берди.
Завод қурилишини битказиш дастлаб 2014 йил декабрига мўлжалланган эди. Энди қурилиш ишларини тезлаштириш бўйича чора-тедбирлар амалга оширилмоқда. «Қурилиш муддатининг тезлаштирилиши Ўзбекистонда аҳолини ва озиқ-овқат саноатини шакар билан таъминлашда юзага келган муаммоларни ҳал қилишга қаратилган», — дейилади хабарда.
Ўзбекистон Озиқ-овқат саноати ассоциацияси маълумотига кўра, соҳадаги кондитерлик корхоналарининг шакарга бўлган эҳтиёжи тахминан 40 фоизга қондирилмоқда.
Ўзбекистон Республикасининг Хусусийлаштириш, монополиядан чиқариш ва рақобатни ривожлантириш давлат қўмитаси шакар маҳсулоти «сунъий тақчиллиги»нинг келиб чиқишига асосий сабаб оддий олибсотарлик, шу жумладан ушбу маҳсулот бозорида фаолият кўрсатаётган улгуржи воситачилар ҳамда чакана савдо дўконлари ўртасида ўзаро тил бириктириш, келишиб ҳаракат қилиш ҳолатлари ҳам эҳтимолдан холи эмаслигидир, дея изоҳ берган эди.
«Ангрен Шакар» МЧЖ ХК «Ангрен» махсус индустриал зонасида 2012 йилнинг май ойида Сингапурнинг Welton International, Kito Investment ва Австриянинг SEID Handelsgesellschaft m.b.H томонидан тузилган эди.
Ушбу компаниялар республикамиздаги шакар ишлаб чиқариш бўйича монопол корхона — «Хоразм Шакар» ОАЖ ХКнинг акционерлари ҳам ҳисобланади. Айни пайтда унинг қуввати суткасига минг тонна шакарни ташкил қилмоқда.
Расмий маълумотларга кўра, Ўзбекистоннинг шакарга бўлган йиллик эҳтиёжи 700 минг тоннани ташкил этади, шундан 350 минг тоннаси жаҳон бозоридан сотиб олинади.
Изоҳ (0)