Путин ва Порошенко Украинадаги тангликни телефон орқали муҳокама қилди

Россия президенти Владимир Путин ва Украина президенти Пётр Порошенко Киев томонидан илгари сурилаётган Донбасс минтақасидаги зиддиятларни тинч йўл билан ҳал қилиш таклифини телефон орқали муҳокама қилди. Бу ҳақда Reuters хабар берди.

Ўтган сешанба куни ушбу ҳудудда Украина ҳарбийлари томонидан ўтказилган операциялар туфайли Россия Давлат телевидениеси мухбири ва видеомуҳандиси ҳалок бўлган. Бу ҳақда Россия Давлат теле ва радио узатиш холдинги (ВГТРК) хабар бериб, улар Игорь Корнелюк ва Антон Волошин эканлиги тасдиқланди.

«Владимир Путин россиялик журналистларнинг Луганск ҳудудидаги фожиали ўлимидан қайғурмоқда ва ўз эътиборини ОАВ вакилларининг хавфсизлигини кучайтириш масаласига қаратди», — деб хабар беради Кремль, суҳбатдан сўнг.

Украина армияси бу ҳудудда «аксилтеррорчилик операциялари» ни амалга оширмоқда. Кремль  ва Россия  Давлат телевидениеси эса уларни «жазо операцияси» деб аташмоқда. Порошенко ҳафта давомида айирмачилардан Россия билан чегарадош ҳудудларни қайтариб олишга ваъда берди. Шундан сўнг, улар билан музокаралар олиб борилади ва уларга амнистия таклиф қилинади. Исён кўтарилган ҳудуд аҳолиси орасида эса, конституцияни ислоҳ қилиш ва маҳаллий етакчилар сайлаш йўли билан қон тўкилишини тўхтатиш назарда тутилган.

Кремлнинг хабар беришича, май охирида Украина президентлигига сайланган Пётр Порошенко ва Россия президенти Владимир Путин Нормандияда бўлиб ўтган «Д куни» маросимида қисқа суҳбат қуришган бўлса-да, улар орасида расмий учрашув бўлгани йўқ.