«Катта еттилик» етакчилари Суриядаги сайлов натижаларини тан олишдан бош тортди

G7 етакчилари Суриядаги президентлик сайловларини қоралади. Брюсселда тарқатилган G7 саммити коммюникесида шундай дейилади.

Interfax хабар беришича, улар шунингдек, БМТ Хавфсизлик Кенгашида Сурияда давом этаётган жиддий жиноятлар юзасидан Халқаро жиноят судига мурожаат қилиш резолюцияси лойиҳасига Россия ва Хитой вето қўйганига афсус билдирди.

«Биз Асаднинг шафқатсиз режимини қатъий қоралаймиз. У 160 минг кишининг умрига зомин бўлган ва 9,3 миллион кишини эса гуманитар ёрдамга эҳтиёжманд қилиб қўйган низоларни келтириб чиқарди. Биз 3 июндаги сохта президентлик сайловларини қоралаймиз», — дейилади коммюникеда.

Эслатиб ўтамиз, Суриянинг амалдаги президенти Башар Асад давлат раҳбарлигига сайловларда катта устунлик — 88,7% овоз билан ғалаба қозонди. Энди у яна етти йил мамлакатни бошқаради.