Суриянинг амалдаги президенти Башар Асад давлат раҳбарлигига сайловларда катта устунлик билан ғалаба қозонди. Энди у яна етти йил мамлакатни бошқаради. Бу ҳақда Associated Press хабар берди.
4 июнь куни кечқурун парламент спикери овоз беришнинг якуний натижаларини эълон қилди. Унга кўра, Асадга сайловчиларнинг 88,7 фоизи овоз берган, бу 10,3 миллион киши демакдир. Унинг рақиблари — Ҳассан Абдул Иллоҳи ан-Нурий ва Моҳир Абдул Ҳафиз Ҳожар 4,3 ва 3,2 фоиз овоз тўплади. Олий конституциявий суднинг маълум қилишича, овоз беришда сайловчиларнинг 73,42 фоизи иштирок этган.
Дамашқ аҳолиси ушбу янгиликни олқишлар ва ҳавога ўқ отишлар билан кутиб олди. Асаднинг минглаб тарафдорлари унинг фотосуратлари ва миллий байроқлар билан пойтахт кўчаларини тўлдириб сайлов натижаларини қутлади.
Agence France-Presse хабар беришича, байрамона ўқ узишлар натижасида Дамашқда камида уч киши ҳалок бўлган, яна ўнлаб кишилар яраланган. Мамлакат шимолидаги Халеб шаҳрида эса 20 киши жароҳат олган.
Сурияда ўтказилган сайлов мамлакат энг янги тарихида альтернатив асосдаги биринчиси бўлди. Сайловлар ҳукумат томонидан назорат ўрнатилган ҳудудларда бўлиб ўтди. Мамлакатнинг шимоли ва шарқида ҳамон фуқаролар уруши давом этмоқда.
Изоҳ (0)