АҚШ Ливиядаги вазият кескинлашуви сабабли Ўрта ер денгизига бортида минглаб денгиз пиёдалари бўлган Bataan десант кемасини жўнатди. Бу ҳақда «ИТАР-ТАСС» хабар берди.
Пентагон вакилларининг таъкидлашича, америкалик ҳарбий хизматчилар АҚШнинг Триполидаги элчихонаси хавфсизлигини таъминлаш ва у ердаги ходимларни ўз ватанига эвакуация қилишда фойдаланилиши мумкин.
Баъзи маълумотларга кўра, Иордания қуролли кучлари билан халқаро ҳарбий машғулотларда қатнашган Bataan сешанба куни Қизил денгиздан Суэц канали орқали Ўрта ер денгизига ўтган.
Аввалроқ эса АҚШ ўзининг Испаниядаги базасидан 250 га яқин денгиз пиёдалари ва бир нечта «Оспри» конвертопланларини Сицилияга кўчирган эди.
Ливияда радикал исломий гуруҳларга қарши ҳарбий операция бошлаган истеъфодаги генерал Халифа Хафтар бош вазир Аҳмад Майтиг раҳбарлигидаги янги ҳукуматни тан олишдан бош тортди. Бундан ташқари, у 25 июнга белгиланган парламент сайловларини кейинга қолдиришни таклиф қилган.
Янги бош вазир уйи олдида содир бўлган отишма натижасида бир киши ҳалок бўлган. Отишма номаълум қуролли гуруҳ билан Майтиг соқчилари ўртасида кечган.
Якшанба куни Ливия муваққат парламенти — Умуммиллий конгресс Майтиг ҳукуматига ишонч билдирди. Бунда мажлисдаги 93 депутатдан 83 нафари уни қўллаб овоз берган.
42 ёшли тадбиркор Майтиг «Мусулмон биродарлар» кўмагидан фойдалангани учун унинг номзоди баҳсларга сабаб бўлган, бироқ парламент спикери Нури Абу Сахмейн буйруғи билан 5 майдаги мунозарали сайловлардан кейиноқ барибир лавозимга тайинланган. Ўшанда Либерал блок исломий кучларни ўз гумаштасини «тиқиштириш»да айблаган.
Изоҳ (0)