Эрон суди Facebook асосчиси Марк Цукербергни унинг компаниясига тегишли бўлган Instagram ва WhatsApp дастурлари фойдаланувчиларининг шахсий ҳаётига аралашганлик ҳақидаги ишни эшитиш учун чақирди. Бу ҳақда Interfax хабар берди. Суд шунингдек, мамлакат ҳудудида ҳар иккала дастурни ёпиб қўйиш ҳақида қарор чиқарди.
Associated Press’нинг таъкидлашича, Цукерберг Эрон судига бориши амри маҳол, чунки Теҳрон ва Вашингтон ўртасида экстрадиция (давлатлар ўртасида жиноятчиликка қарши кураш бўйича ҳамкорлик) тўғрисида битим мавжуд эмас.
Ўтган ҳафта Эрон суди мамлакатда Instagram ижтимоий тармоғини ёпиб қўйиш ҳақида қарор чиқарган, бироқ сешанба куни у фаолият кўрсатаётган эди.
Май ойида WhatsApp оммабоп мессенжерининг ёпилиши ҳақида хабарлар тарқаган, бироқ расмий Теҳрон уларни тезда рад этган.
Мамлакат ҳукумати интернет-макон ва ижтимоий тармоқларни филтрлаш билан фаол шуғулланади. 2009 йилдан эронликлар учун Twitter, Facebook ва YouTube ёпиб қўйилган.
Изоҳ (0)