Абхазия хавфсизлик кенгаши котиби мамлакатдаги вазиятни давлат тўнтарилишига уриниш деб атади

Абхазия Хавфсизлик кенгаши котиби Нугзар Ашуба републикада содир бўлаётган воқеаларни давлат тўнтарилишига уриниш деб атади. Бу ҳақда «ИТАР-ТАСС» хабар берди.

«Ҳукумат, бош прокурор ва Абхазиянинг шарқий туманлари раҳбарлари истеъфога чиқишини талаб қилаётган мухолифат етакчилари билан музокаралар чоғида келишувга деярли эришилган эди, — деди у. — Бироқ мухолифат тарафдорларининг президент маъмуриятини эгаллаб олишга уриниши натижасида келишув чиппакка чиқди».

Ашубанинг айтишича, шундан сўнг «президент ҳеч кимни истеъфога чиқармаган, ўзи ҳам истеъфо бермаган».

Президент билан музокаралар самарасиз якунлангач, Абхазиянинг Халқ бирдамлиги форуми мухолифат партияси раиси Раул Хажимба мухолифат партиялар ва ҳаракатлар Мувофиқлаштирувчи кенгаши «барча зарур тузилмаларни шакллантириш билан шуғулланувчи муваққат раҳбарият вазифасини ўз бўйнига олиш» ҳақида қарор қабул қилгани тўғрисида баёнот берган.

Апрель охирида Абхазия мухолифат партиялари мувофиқлаштирувчи кенгаши ва жамоатчилик ташкилотлари вакиллари президентдан вазирлар маҳкамасини истеъфога чиқариш, бир ой ичида президент ваколатларининг бир қисмини парламент ва республика ҳукуматига ўтказиш ҳақида конституцияга ўзгартиш киритишни, шунингдек бош прокурор ва бир нечта туманлар раҳбарларини ишдан бўшатишни талаб қилган.

Уларга жавобан президент «ультиматум тарзидаги бундай талаблар ножоиз ва самарасиз» эканини таъкидлаган.