Абхазия президенти Александр Анкваб республика ҳукуматини истеъфога чиқарди. Бу ҳақда «РИА Новости» хабар берди.
Мухолифат Сухумдаги ҳукумат резиденцияси ёнида митинглар уюштиришда давом этмоқда. Сухум шаҳар мажлиси раиси Константин Пилиянинг айтишича, вазирлар маҳкамаси истеъфоси ҳақидаги якуний ҳужжатни ҳеч ким кўрмаган.
Мамлакат президенти абхаз телевидениесига берган интервьюсида республикада сўнгги вақтларда бўлиб ўтган воқеаларни давлат тўнтариши уюштиришга уриниш деб атади. У шунингдек, куч идоралари мухолифат Сухумдаги президент қароргоҳини эгаллаб олмоқчи бўлганидан кейин юзага келган вазиятни барқарорлаштириш учун зарур барча чораларни кўраётганини таъкидлади.
27 май куни Сухум марказида ҳукумат, бош прокурор ва Абхазиянинг шарқий туманлари раҳбарлари истеъфога чиқишини талаб қилаётган мухолифат намойишлари бўлиб ўтган.
Президент билан музокаралар самарасиз якунлангач, Абхазиянинг Халқ бирдамлиги форуми мухолифат партияси раиси Раул Хажимба мухолифат партиялар ва ҳаракатлар Мувофиқлаштирувчи кенгаши «барча зарур тузилмаларни шакллантириш билан шуғулланувчи муваққат раҳбарият вазифасини ўз бўйнига олиш» ҳақида қарор қабул қилгани тўғрисида баёнот берган.
Изоҳ (0)