Yana 3 nafar ota-ona qaramog‘isiz qolgan bola xorijdan O‘zbekistonga qaytarildi, deb xabar bermoqda Ijtimoiy himoya milliy agentligi matbuot xizmati.
Ulardan bir nafari Rossiyadan, qolgani ikki nafari esa Xitoydan Ichki ishlar vazirligi xodimlari ko‘magida keltirildi.
Qayd etilishicha, agentlik tomonidan voyaga yetmaganlarning oilalari va O‘zbekistondagi yaqin qarindoshlari oldindan o‘rganib chiqilgan bo‘lib, ularning og‘ir turmush sharoitida qoldirilgani baholanmoqda.
Keyinchalik ularga bolaning ehtiyojlaridan kelib chiqqan holda psixologik yordam, huquqiy maslahatlar, o‘qishga joylashtirish va boshqa xizmatlarni o‘z ichiga olgan kompleks ijtimoiy xizmatlar ko‘rsatiladi.
Xabarda aytilishicha, oktyabr oyi boshidan xorijda ota-ona qaramog‘idan mahrum bo‘lgan 11 nafar bola O‘zbekistonga qaytarildi.Yaqin kunlarda Rossiyadan yana bir guruh bolalar olib kelinishi rejalashtirilmoqda.
Oktyabr oyining dastlabki kunlarida xorijda ota-ona qaramog‘idan mahrum bo‘lgan 4 nafar bola O‘zbekistonga qaytarilgandi. Ularning 3 nafari Turkiyadan, 1 nafari Rossiyadan olib kelindi.
Avgust-sentyabr oylarida xorijda ota-ona qaramog‘idan mahrum bo‘lgan 34 nafar bola O‘zbekistonga qaytarildi.
Izoh (0)