Xorijdan navbatdagi qarovsiz qolgan bolalar guruhi olib kelindi, deb xabar bermoqda Ijtimoiy himoya milliy agentligi axborot xizmati.
Ma’lum qilinishicha, 1-sentyabrda 14 nafar xorijda ota-ona qaramog‘isiz qiyin vaziyatga tushib qolgan o‘zbekistonlik bolalar O‘zbekistonga qaytarib olib kelindi. Mazkur guruhdagi bolalar Rossiyaning Sankt-Peterburg shahridan Ichki ishlar hamda Sog‘liqni saqlash vazirliklari mas’ul xodimlarining xizmat safarlari doirasida Rossiyadan Toshkentga olib kelindi.
Ijtimoiy himoya milliy agentligi va mas’ul tashkilotlar hamkorligida qaytarib olib kelingan bolalar ota-onasi va o‘z yaqinlarining qaramog‘iga qaytariladi. Ularga o‘zlarining yashash manziliga yaqin “Inson” ijtimoiy xizmatlar markazlari tomonidan bir qator ijtimoiy xizmatlar, jumladan, bolalarning o‘zlari va ularning oila a’zolariga psixologik va huquqiy yordam ko‘rsatib borish belgilangan.
Qayd etilishicha, Ijtimoiy himoya milliy agentligi tomonidan Tashqi ishlar vazirligi ko‘magida Ichki ishlar vazirligi mas’ul xodimlari hamrohligida xorijiy mamlakatlarda ota-ona qaramog‘isiz qolgan va mamlakatga qaytarilishi rejalashtirilgan voyaga yetmagan bolalarni olib kelinguniga qadar ularni oilalariga qaytarish va jamiyatga ijtimoiylashuvini tashkil etish bo‘yicha zarur tayyorgarlik ishlari amalga oshirilmoqda.
Shu kunlarda Rossiyaning turli hududlarida qarovsiz qolib ketgan 31 nafar bola O‘zbekistonga qaytarilgan. 25-avgust kuni 9 nafar bola, bundan avval 22 nafar bola (13 nafari — Sankt-Peterburg shahridan, 9 nafari — Moskva shahridan, 8 nafari — Novosibirsk shahridan, 1 nafari — Qozon shahridan olib kelingan) Ichki ishlar vazirligi vakillari hamrohligida qaytarildi.
Izoh (0)