Яна 3 нафар ота-она қарамоғисиз қолган бола хориждан Ўзбекистонга қайтарилди, деб хабар бермоқда Ижтимоий ҳимоя миллий агентлиги матбуот хизмати.
Улардан бир нафари Россиядан, қолгани икки нафари эса Хитойдан Ички ишлар вазирлиги ходимлари кўмагида келтирилди.
Қайд этилишича, агентлик томонидан вояга етмаганларнинг оилалари ва Ўзбекистондаги яқин қариндошлари олдиндан ўрганиб чиқилган бўлиб, уларнинг оғир турмуш шароитида қолдирилгани баҳоланмоқда.
Кейинчалик уларга боланинг эҳтиёжларидан келиб чиққан ҳолда психологик ёрдам, ҳуқуқий маслаҳатлар, ўқишга жойлаштириш ва бошқа хизматларни ўз ичига олган комплекс ижтимоий хизматлар кўрсатилади.
Хабарда айтилишича, октябрь ойи бошидан хорижда ота-она қарамоғидан маҳрум бўлган 11 нафар бола Ўзбекистонга қайтарилди.Яқин кунларда Россиядан яна бир гуруҳ болалар олиб келиниши режалаштирилмоқда.
Октябрь ойининг дастлабки кунларида хорижда ота-она қарамоғидан маҳрум бўлган 4 нафар бола Ўзбекистонга қайтарилганди. Уларнинг 3 нафари Туркиядан, 1 нафари Россиядан олиб келинди.
Август-сентябрь ойларида хорижда ота-она қарамоғидан маҳрум бўлган 34 нафар бола Ўзбекистонга қайтарилди.
Изоҳ (0)