Rossiyada ota-ona qaramog‘isiz qiyin vaziyatga tushib qolgan bola O‘zbekistonga olib kelindi, deb xabar bermoqda Ijtimoiy himoya milliy agentligi.
![](/static/2024/09/12/samo-keCc9_wa.jpg)
Ma’lum qilinishicha, 12-sentyabrda xorijda ota-ona qaramog‘isiz qiyin hayotiy vaziyatga tushib qolgan o‘zbekistonlik bir nafar bola mamlakatga qaytarib olib kelindi. Agentlik hamda Ichki ishlar vazirligi mas’ul xodimlarining ko‘magi ostida Rossiyadan Toshkentga olib kelingan bola buvisining qaramog‘iga topshirildi.
Ijtimoiy himoya milliy agentligi tomonidan endilikda ularga o‘zlarining yashash manziliga yaqin “Inson” ijtimoiy xizmatlar markazlari tomonidan bir qator ijtimoiy xizmatlar, jumladan, bolalarning o‘zlari va ularning oila a’zolariga psixologik va huquqiy yordam ko‘rsatib borish belgilangan.
Qayd etilishicha, Ijtimoiy himoya milliy agentligi tomonidan Tashqi ishlar vazirligi ko‘magida Ichki ishlar vazirligi mas’ul xodimlari hamrohligida xorijiy mamlakatlarda ota-ona qaramog‘isiz qolgan va qaytarilishi rejalashtirilgan voyaga yetmagan bolalar olib kelinguniga qadar ularni oilalariga qaytarish va jamiyatga ijtimoiylashuvini tashkil etish bo‘yicha zarur tayyorgarlik ishlari amalga oshirilmoqda.
Shu kunlarda Rossiyaning turli hududlarida qarovsiz qolib ketgan 31 nafar bola O‘zbekistonga qaytarilgan. 25-avgust kuni 9 nafar bola, bundan avval 22 nafar bola (13 nafari — Sankt-Peterburg shahridan, 9 nafari — Moskva shahridan, 8 nafari — Novosibirsk shahridan, 1 nafari — Qozon shahridan olib kelingan) Ichki ishlar vazirligi vakillari hamrohligida qaytarildi.
Izoh (0)