Buxoro viloyatidagi qator yodgorliklarda bajarilgan ish hujjatlariga soxta yozuvlar kiritish yo‘li bilan restavratsiya va taʼmirlash ishlarida pul mablag‘lari talon-toroj qilingani aniqlandi. Bu haqda Bosh prokuratura matbuot xizmati xabar berdi.
Qayd etilishicha, bosh prokuror o‘rinbosari boshchiligidagi ishchi guruh tomonidan Madaniy meros agentligi mutaxassislari bilan birgalikda Buxoro shahridagi bir qator tarixiy yodgorliklar — “Xo‘ja Kalon” masjidi, “Husayni” va “Nodir Devonbegi” madrasalari hamda “Ark” majmuasi devorlarini restavratsiya va taʼmirlash ishlari bilan yaqindan tanishilgan.
O‘rganishda ushbu yodgorliklarda bajarilgan ish hujjatlariga soxta yozuvlar kiritish yo‘li bilan restavratsiya va taʼmirlash ishlarida:
- “Xo‘ja Kalon” masjidida — 731 million so‘m;
- “Husayni” madrasasida — 216 million so‘m;
- “Nodir Devonbegi” madrasasida — 90 million so‘m;
- Buxoro shahri tarixiy markazi hududida joylashgan 74 ta obyektga manzil ko‘rsatgich belgilari o‘rnatish uchun ajratilgan 50 million so‘m byudjet mablag‘i talon-taroj qilingani aniqlangan.
Bundan tashqari, Buxoro mintaqaviy restavratsiya markazi mansabdor shaxslari tomonidan 2,3 milliard so‘m byudjet mablag‘i tovar-moddiy boyliklar sotib olish uchun sarflangani yuzasidan hujjatlar rasmiylashtirilib, amalda mablag‘lar talon-taroj qilingan.
O‘rganish natijasiga ko‘ra, Buxoro mintaqaviy restavratsiya markazi mansabdor shaxslari va boshqalarga nisbatan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) 3-qismi “a” bandi va 209-moddasi 2-qismi “a” bandi bilan jinoyat ishi qo‘zg‘atilgan.
2023-yil aprel oyida Buxoroda madaniy meros obyekti bo‘lgan “G‘oziyon” madrasasi tashlandiq holatga kelib qolgani to‘g‘risida xabar berilgandi.
Izoh (0)