Бухоро вилоятидаги қатор ёдгорликларда бажарилган иш ҳужжатларига сохта ёзувлар киритиш йўли билан реставрация ва таъмирлаш ишларида пул маблағлари талон-торож қилингани аниқланди. Бу ҳақда Бош прокуратура матбуот хизмати хабар берди.
Қайд этилишича, бош прокурор ўринбосари бошчилигидаги ишчи гуруҳ томонидан Маданий мерос агентлиги мутахассислари билан биргаликда Бухоро шаҳридаги бир қатор тарихий ёдгорликлар — “Хўжа Калон” масжиди, “Ҳусайни” ва “Нодир Девонбеги” мадрасалари ҳамда “Арк” мажмуаси деворларини реставрация ва таъмирлаш ишлари билан яқиндан танишилган.
Ўрганишда ушбу ёдгорликларда бажарилган иш ҳужжатларига сохта ёзувлар киритиш йўли билан реставрация ва таъмирлаш ишларида:
- “Хўжа Калон” масжидида — 731 миллион сўм;
- “Ҳусайни” мадрасасида — 216 миллион сўм;
- “Нодир Девонбеги” мадрасасида — 90 миллион сўм;
- Бухоро шаҳри тарихий маркази ҳудудида жойлашган 74 та объектга манзил кўрсатгич белгилари ўрнатиш учун ажратилган 50 миллион сўм бюджет маблағи талон-тарож қилингани аниқланган.
Бундан ташқари, Бухоро минтақавий реставрация маркази мансабдор шахслари томонидан 2,3 миллиард сўм бюджет маблағи товар-моддий бойликлар сотиб олиш учун сарфлангани юзасидан ҳужжатлар расмийлаштирилиб, амалда маблағлар талон-тарож қилинган.
Ўрганиш натижасига кўра, Бухоро минтақавий реставрация маркази мансабдор шахслари ва бошқаларга нисбатан Жиноят кодексининг 167-моддаси (ўзлаштириш ёки растрата йўли билан талон-торож қилиш) 3-қисми “а” банди ва 209-моддаси 2-қисми “а” банди билан жиноят иши қўзғатилган.
2023 йил апрель ойида Бухорода маданий мерос объекти бўлган “Ғозиён” мадрасаси ташландиқ ҳолатга келиб қолгани тўғрисида хабар берилганди.
Изоҳ (0)