Qashqadaryo viloyati Qarshi shahrida qator tarixiy obyektlar butkul yo‘qolib ketish xavfi ostida ekani haqida xabar berildi. Madaniy meros agentligi bu bo‘yicha ma’lumot berdi.
Unga ko‘ra, Madaniy meros agentligining Qashqadaryo viloyat boshqarmasi tomonidan vaziyat atroflicha o‘rganilgan. Qarshi shahar “Haramjo‘y” MFY hududida joylashgan Haramjo‘y masjidida 2022–2023-yillar davomida restavratsiya ishlari olib borilgan bo‘lib, hozirgi kunda ayni jarayon to‘liq tugallangan. Inshoot topshirishga tayyor holga keltirilgan.
Qayd etilishicha, Kulol masjidida 2024-yilda qayta tiklash ishlari amalga oshirilishi rejalashtirilgan va hozirgi kunda tegishli hujjatlar rasmiylashtirilayotgan bo‘lsa, Sharifboy madrasasida esa restavratsiya jarayoni boshlab yuborilgan.
Chaqar masjidi esa XIX asrda bunyod etilgan bo‘lib, hozirgi kungacha yaxshi holatda saqlangan. Inshoot mahalliy aholi tomonidan bir necha bor qayta ta’mirlangan. Shunga qaramasdan, masjidni 2025-yilgi ta’mirlash va tiklash ishlari rejasiga kiritish ko‘zda tutilgan.
Izoh (0)