Buxorodagi “Masjidi Kalon”ga plastik va alyuminiy romlar o‘rnatilgani aks etgan suratlar ijtimoiy tarmoqlarda tarqalib keng muhokamalarga sabab bo‘ldi. Madaniy meros agentligi bunga munosabat bildirdi.
Ma’lum qilinishicha, “Masjidi Kalon” Musulmonlar idorasining Buxoro viloyati vakilligiga masjid sifatida foydalanish uchun topshirilgan. Plastik va alyumin romlar 2016-yilda namozxonlarga qulayliklar yaratish maqsadida masjid maʼmuriyati tomonidan o‘rnatilgan.
Hukumat tomonidan tasdiqlangan “Madaniy meros obyektlarini restavratsiya qilish va taʼmirlash-tiklash bo‘yicha 2023-yilgi Manzilli dastur”ga asosan “Masjidi Kalon”ni ham restavratsiya qilish, taʼmirlash-tiklash va obodonlashtirish bo‘yicha loyiha-smeta hujjatlari ishlab chiqilib, Madaniy meros agentligi huzuridagi ilmiy-ekspert kengashi hamda tegishli tashkilotlar tomonidan maʼqullangan.
Hozirda mazkur loyiha asosida masjidni restavratsiya qilishning 1-bosqichi doirasida tom qismini taʼmirlash hamda konstruktiv jihatdan mustahkamlash ishlari olib borilmoqda.
Loyihaga ko‘ra, masjiddagi plastik va alyuminiy romlarni binoning arxitekturasiga mos keladigan anʼanaviy yog‘och romlarga almashtiriladi. Mazkur ishlar taʼmirlashning 2-bosqichida amalga oshirilishi belgilangan.
Agentlik obyektga kirish pullik ekaniga ham izoh berib o‘tdi.
“Haqiqatan ham masjidga mahalliy va xorijiy sayohatchilar uchun kirish pullik bo‘lib, namozxonlar va ziyoratchilar uchun alohida kirish joylari mavjud bo‘lib ulardan yig‘im undirilmaydi. Obyektga kirish biletlarini sotishdan tushgan mablag‘lar obyektni saqlash va joriy taʼmirlash ishlariga sarflanadi”, — deyiladi izohda.
Izoh (0)