Isroil okkupatsiyasi ostida bo‘lgan Iordan daryosining g‘arbiy qirg‘og‘ida joylashgan qishloq haqida hikoya qiluvchi “Boshqa yer yo‘q” hujjatli filmi “Yilning eng yaxshi hujjatli filmi” sifatida “Oskar” mukofotini qo‘lga kiritdi. Taqdirlash marosimida so‘zga chiqqan film rejissyorlari Isroil va Falastin mojarosiga barham berishga chaqirdi.
“Ikki oy avval men ota bo‘ldim, umid qilamanki, qizim menga o‘xshab yashamaydi”, dedi film rejissyorlaridan biri Basel Adra.
Shuningdek, Adra uning qishlog‘i to‘qnash kelayotgan uylarning buzilishi hamda aholini ko‘chirish kabi muammolar haqida ham so‘zlab berdi.
“Biz butun dunyoni adolatsizlikka barham berishga hamda Falastin xalqini etnik tozalashni to‘xtatishga chaqiramiz”, dedi u.
Isroillik jurnalist-tadqiqotchi Yuval Abraham, “Boshqa yer yo‘q” filmining rejissyorlaridan Adrani o‘z akasi deb atadi, biroq ularni bir-biriga teng emas deb hisoblashlaridan noroziligini bildirdi.
“Biz fuqarolik qonunlariga ko‘ra erkin bo‘lgan rejimda yashayapmiz, Basel esa uning hayotini buzadigan harbiy qonunlarga amal qiladi”, dedi Abraham.
Abraham bir necha o‘n yillik mobaynida Yaqin Sharqni “yutib yuborayotgan” zo‘ravonliikka chek qo‘yishga chorladi.
“Biz isroilliklar va falastinliklar bu filmni birga suratga oldik, chunki birgalikda bizning ovozimiz kuchliroq. Biz bir-birimizni ko‘ryapmiz”, deydi Abraham.
Abraham dunyoni “Etnik kelib chiqishidan qat’i nazar, ikki xalq uchun milliy huquqlarga ega bo‘lgan boshqa yo‘l, siyosiy chora izlashga” chaqirdi.
Izoh (0)