Isroil armiyasi zarurat tug‘ilganda Rossiya tomonidan Eronga yetkazib berilgan havo hujumidan mudofaa tizimlarini nishonga oladi. Bu haqda Isroil Moliya vazirligi rasmiysi Zeev Elkin xabar berdi.

Eron 2003-yildanoq Rossiya havo mudofaa tizimlarini sotib olishga qiziqish bildirgan. 2016-yil bahorida Tehron S-300 zenit-raketa komplekslarining birinchi partiyasini olgan edi. Bu tizimlar 2017-yilda jangovar navbatchilikka qo‘yilgan. 

Isroil aviatsiyasi muammolarni, jumladan, Rossiya havo mudofaasini bartaraf eta oladi. Bu Eronga qarshi so‘nggi urushda amalda sinovdan o‘tdi. Biz buni xohlamagan edik va Rossiyadan S-300 yetkazib berishdan tiyilishni so‘ragandik. Ammo ular yetkazib berilgan ekan, ular bilan shug‘ullanishga majbur bo‘ldik, dedi Elkin.

U yahudiy davlati Rossiyani bir necha bor Eronning yadroviy tadqiqotlari haqida ogohlantirganini ta’kidladi.

Rossiya va Eron o‘rtasidagi harbiy hamkorlik Isroilni Rossiya—Suriya hamkorligidan ko‘ra ko‘proq tashvishga solgan, dedi yahudiy mulozimi.

U Eronni “hech narsa cheklamaydigan diniy mutaassiblar” nazorat qilayotgani, mamlakatning kuchayishi Yaqin Sharq uchun “xavf tug‘dirishi”ni da’vo qildi.

Eron yadro bombasi yaratish va hozirgidan ham uzoq masofaga uchadigan ballistik raketalarni ishlab chiqish niyatida, dedi u.

Isroilning Eronga hujumi va AQSH ishtiroki

13-iyun kuni Isroil Eronning yashirin harbiy-yadro dasturini bahona qilib, keng ko‘lamli operatsiya boshladi. Axios nashriga ko‘ra, Isroil shu kuni Eron ichkarisida yashirin diversiyalar o‘tkazib, strategik raketa obyektlari va mudofaa tizimlariga zarar yetkazgan. “Hamdam” va “Tabriz” aviabazalariga hujum qilinib, o‘nlab dron va raketa qurilmalari yo‘q qilingan.

Eron yahudiy davlatining ayblovlarni rad etgan va javoban hujumlar uyushtirgan. 12 kunlik qarama-qarshilik davomida AQSH ham aralashib, 22-iyun kechasi Eron yadro obyektlariga zarba bergan. Bunga javoban Eron 23-iyun kuni Qatardagi AQSHning Al-Udeyd bazasini nishonga olgan. Tehron mojaro kengayishini istamasligini bildirgan.

Putinning Eronga havo mudofaa tizimi yuborilganiga munosabati

Rossiya prezidenti Vladimir Putin Tehronga havo mudofaa tizimlarini birgalikda ishlab chiqishni taklif qilganini, ammo Eron bunga qiziqish bildirmaganini aytgan. Rossiyaning Eronga S-300 va modernizatsiya qilingan S-200 tizimlarini yetkazib bergani eslatilganda, Putin shunday javob bergan:

Bilasizmi, bu mutlaqo boshqa masala. Chunki bizning taklifimiz boshqacha: alohida yetkazib berishlar emas, balki tizimlarni yaratish haqida edi... Biz bir paytlar buni muhokama qilganmiz, lekin Eron tomoni bunga jiddiy qiziqish bildirmadi va tashabbus o‘z-o‘zidan so‘ndi. Alohida yetkazib berishlarga kelsak: ha, albatta, biz o‘z vaqtida bunday yetkazib berishlarni amalga oshirganmiz. Biroq buning bugungi inqiroz bilan hech qanday aloqasi yo‘q, degan edi u.