Germaniyada endi nafaqat hamshiralar, balki istalgan yo‘nalishdagi o‘zbekistonlik o‘rta tibbiyot xodimlari ishlashi mumkin. Bu haqda Migratsiya agentligi xabar berdi.
Ma’lum qilinishicha, Migratsiya agentligi Germaniyaning Bildung & Beruf GmbH kompaniyasi bilan hamkorlikda “Parvarishlovchi hamshira” lavozimi bo‘yicha yangi ish o‘rinlarini taklif etmoqda.
Bo‘sh ish o‘rinlari soni 60 ta. Oylik maosh: 1800–2200 yevro, uy-joy ijarasi va ovqatlanish xarajatlari nomzod hisobidan qoplanadi. Talablar:
- Kamida 1 yillik ish tajribasi (hamshiralik sohasida);
- Nemis tilidan A2+ yoki B1 darajadagi sertifikatga ega bo‘lish;
- 18–40 yosh oralig‘ida bo‘lish;
- Sudlanmagan va sog‘lom bo‘lish.
Tibbiyot kolleji (3 yillik) yoki oliy tibbiy ta’lim (bakalavr) diplomi (istalgan tibbiyot yo‘nalishida) afzallik beradi. Aviachipta, transfer, rasmiy ro‘yxatdan o‘tish xarajatlari va tibbiy sug‘urta qoplab beriladi.
Qo‘shimcha ish soatlari, yakshanba va bayram kunlaridagi ishlarga qo‘shimcha haq to‘lanadi. Germaniyada doimiy qo‘llab-quvvatlash ta’minlanadi.
Bundan avval O‘zbekistondagi 50 nafar tajribali hamshira Germaniyaga ishga taklif qilingan edi. Oylik maosh 2800 yevrodan boshlanadi. Bunda uy ijarasi va ovqatlanish xarajatlari ishlovchining o‘z hisobidan qoplanadi. Malaka tan olingandan so‘ng 3300 yevro oylik beriladi.
Xorijda ishlayotgan o‘zbekistonliklar
2025-yil boshi holatiga 1 340 000 (1,34 mln) nafar o‘zbekistonlik xorijda mehnat faoliyati bilan shug‘ullanamoqda. Ulardan 20 foizini ayollar tashkil qiladi.
Rossiyadagi o‘zbek migrantlar soni 2023-yil oxirida taxminan 1 mln 200 ming kishi edi, 2024-yil oxirida esa bu raqam taxminan 698 mingga tushdi, ya’ni Rossiya hali ham yetakchi davlat bo‘lsa‑da, lekin raqamlar sezilarli kamaygan.
Hukumat 2025-yilda Germaniya, Buyuk Britaniya, Yaponiya, Koreya Respublikasi, Kanada, Isroil, Saudiya Arabistoni, BAA va Polsha kabi iqtisodi rivojlangan 21 davlatda 200 mingdan ortiq o‘zbekistonlikni ish bilan ta’minlashni rejalashtirmoqda.
O‘zbekistonliklar uchun Germaniyaga migratsiya masalasida bir qator yengilliklar ishlab chiqilmoqda. Germaniyada transport, muhandislik sohalarida ishlash istagida bo‘lgan fuqarolar ushbu davlat standartlari asosida Kambag‘allikni qisqartirish va bandlik hamda Transport vazirliklari qoshidagi kasbiy ta’lim muassasalarida germaniyalik mutaxassislar tomonidan til va kasbga o‘rgatiladi.
Izoh (0)