Германияда энди нафақат ҳамширалар, балки исталган йўналишдаги ўзбекистонлик ўрта тиббиёт ходимлари ишлаши мумкин. Бу ҳақда Миграция агентлиги хабар берди.
Маълум қилинишича, Миграция агентлиги Германиянинг Bildung & Beruf GmbH компанияси билан ҳамкорликда “Парваришловчи ҳамшира” лавозими бўйича янги иш ўринларини таклиф этмоқда.
Бўш иш ўринлари сони 60 та. Ойлик маош: 1800–2200 евро, уй-жой ижараси ва овқатланиш харажатлари номзод ҳисобидан қопланади. Талаблар:
- Камида 1 йиллик иш тажрибаси (ҳамширалик соҳасида);
- Немис тилидан А2+ ёки B1 даражадаги сертификатга эга бўлиш;
- 18–40 ёш оралиғида бўлиш;
- Судланмаган ва соғлом бўлиш.
Тиббиёт коллежи (3 йиллик) ёки олий тиббий таълим (бакалавр) дипломи (исталган тиббиёт йўналишида) афзаллик беради. Авиачипта, трансфер, расмий рўйхатдан ўтиш харажатлари ва тиббий суғурта қоплаб берилади.
Қўшимча иш соатлари, якшанба ва байрам кунларидаги ишларга қўшимча ҳақ тўланади. Германияда доимий қўллаб-қувватлаш таъминланади.
Бундан аввал Ўзбекистондаги 50 нафар тажрибали ҳамшира Германияга ишга таклиф қилинган эди. Ойлик маош 2800 евродан бошланади. Бунда уй ижараси ва овқатланиш харажатлари ишловчининг ўз ҳисобидан қопланади. Малака тан олингандан сўнг 3300 евро ойлик берилади.
Хорижда ишлаётган ўзбекистонликлар
2025 йил боши ҳолатига 1 340 000 (1,34 млн) нафар ўзбекистонлик хорижда меҳнат фаолияти билан шуғулланамоқда. Улардан 20 фоизини аёллар ташкил қилади.
Россиядаги ўзбек мигрантлар сони 2023 йил охирида тахминан 1 млн 200 минг киши эди, 2024 йил охирида эса бу рақам тахминан 698 мингга тушди, яъни Россия ҳали ҳам етакчи давлат бўлса‑да, лекин рақамлар сезиларли камайган.
Ҳукумат 2025 йилда Германия, Буюк Британия, Япония, Корея Республикаси, Канада, Исроил, Саудия Арабистони, БАА ва Польша каби иқтисоди ривожланган 21 давлатда 200 мингдан ортиқ ўзбекистонликни иш билан таъминлашни режалаштирмоқда.
Ўзбекистонликлар учун Германияга миграция масаласида бир қатор енгилликлар ишлаб чиқилмоқда. Германияда транспорт, муҳандислик соҳаларида ишлаш истагида бўлган фуқаролар ушбу давлат стандартлари асосида Камбағалликни қисқартириш ва бандлик ҳамда Транспорт вазирликлари қошидаги касбий таълим муассасаларида германиялик мутахассислар томонидан тил ва касбга ўргатилади.
Изоҳ (0)