O‘zbekistonda Ichki ishlar organlari va Milliy gvardiya xodimlari qonuniy talablarini bajarmaganlik uchun jarima miqdori oshirildi.
Prezident tomonidan 31-iyulda imzolangan qonun bilan Ma’muriy javobgarlik to‘g‘risidagi kodeksga ichki ishlar organlari xodimi va Milliy gvardiya harbiy xizmatchisining qonuniy talablarini bajarmaslik bilan bog‘liq huquqbuzarliklar uchun jazo choralari kuchaytirilishini nazarda tutuvchi qo‘shimcha va o‘zgartirishlar kiritildi.
Ichki ishlar organlari xodimining qonuniy talablarini bajarmaslik
Ichki ishlar organlari xodimining qonuniy talablarini bajarmaslik (194-modda) endilikda BHMning 5 baravaridan 12 baravarigacha (2 million 60 ming so‘mdan 4 million 944 ming so‘mgacha) miqdorda jarima solishga sabab bo‘ladi. Ilgari jarima midrori BHMning 1 baravaridan boshlangan.
Bundan huqubuzarlikka ichki ishlar organlari xodimining huquqbuzarlikni to‘xtatish, hujjatlarni tekshirish uchun taqdim etish, ichki ishlar organlariga borish yoki ko‘rsatilgan muddatda ichki ishlar organlarida bo‘lish to‘g‘risidagi qonuniy talablarini uzrli sabablarsiz bajarmaslik, transport vositasini to‘xtatish, jabrlanuvchilarga yordam ko‘rsatish haqidagi qonuniy talablarini bajarmaslik yoxud ichki ishlar organlari xodimining qonuniy talablariga boshqacha tarzda bo‘ysunmaslik, xuddi shuningdek jamoat tartibini saqlash hamda fuqarolarning huquqlari va erkinliklarini ta’minlash vazifalarini amalga oshirayotgan boshqa shaxslarning qonuniy talablarini bajarmaslik kabilar kiradi.
Xuddi shunday huquqbuzarlik ma’muriy jazo chorasi qo‘llanilganidan keyin bir yil davomida takror sodir etilgan bo‘lsa, BHMning 12 baravaridan 30 baravarigacha (4 million 944 ming so‘mdan 12 million 360 ming so‘mgacha) miqdorda jarima solishga yoki 15 sutkagacha muddatga ma’muriy qamoqqa olishga sabab bo‘ladi.
Milliy gvardiya harbiy xizmatchisining (xodimining) qonuniy talablarini bajarmaslik
Bunday huququbuzarlik (194-1-modda) ham BHMning 5 baravaridan 12 baravarigacha miqdorda jarima solishga sabab bo‘ladi. Xuddi shunday huquqbuzarlik ma’muriy jazo chorasi qo‘llanilganidan keyin bir yil davomida takror sodir etilgan bo‘lsa, BHMning 12 baravaridan 30 baravarigacha miqdorda jarima solishga yoki 15 sutkagacha muddatga ma’muriy qamoqqa olishga sabab bo‘ladi.
Ushbu qonun e’lon qilingan kundan boshlab kuchga kirdi.
Izoh (0)