Hindiston Milliy tibbiy komissiyasi abituriyentlarga Markaziy Amerikadagi uchta va O‘zbekistondagi bitta tibbiyot universiteti — Toshkent davlat tibbiyot universiteti Chirchiq filialida tahsil olmaslikni tavsiya qilgani haqida xabar berilgandi. Universitet matbuot xizmati mazkur holat yuzasidan munosabat bildirdi.
Unda ta’kidlanishicha, universitetda akademik va klinik standartlarga qat’iy rioya qilinmoqda. Toshkent davlat tibbiyot universiteti Chirchiq filiali prezidentning 2023-yil 28-iyuldagi qaroriga asosan tashkil etilgan bo‘lib, 2024-yil dekabr oyidan boshlab to‘liq faoliyat yurita boshlagan.
Bugungi kunda filialda 2 ta fakultetda 4 ta bakalavriat ta’lim yo‘nalishi hamda 13 ta klinik ordinatura mutaxassisligi bo‘yicha jami 801 nafar talaba tahsil olmoqda. Xususan, hozirda 5 nafar hindistonlik, 1 nafar iordaniyalik, 8 nafar pokistonlik va 7 nafar misrlik xorijiy talabalar ta’lim olmoqda.
Filialda ta’lim jarayoni O‘zbekistondagi amaldagi tibbiy ta’lim standartlari hamda Jahon tibbiy ta’lim federatsiyasi (WFME) talablariga mos keluvchi zamonaviy o‘quv dasturlari asosida tashkil etilgan. 10 ga yaqin Toshkent viloyati va Chirchiq shahridagi klinik bazalarda talabalar malakali mutaxassislar rahbarligida amaliy ko‘nikmalarni egallamoqda.
Filial Butunjahon tibbiy ta’lim federatsiyasi (WFME) hamda Xalqaro tibbiy ta’limni rivojlantirish jamg‘armasi (FAIMER) tomonidan yuritiladigan The World Directory of Medical Schools ro‘yxatiga kiritilgan.
Shuningdek, infratuzilma va moddiy-texnika bazasi — zamonaviy va keng qamrovli ekani ta’kidlangan. Filialda zamonaviy o‘quv binolari, laboratoriyalar, simulyasion markazlar, elektron ta’lim platformalari, axborot-resurs markazi (kutubxona) va talabalarga mo‘ljallangan turar joylar barcha zarur sharoitlar bilan ta’minlangan.
Talabalar uchun ochiq va shaffof muhit yaratilgani ham aytildi. Filial faoliyatida shaffoflik, akademik erkinlik, tenglik va talabalar huquqlarini himoya qilish ustuvor tamoyil hisoblanadi. Hech qanday bosim yoki majburlash holatlariga yo‘l qo‘yilmaydi. Barcha o‘qish shartlari, to‘lov miqdori va akademik talablarga oid ma’lumotlar rasmiy manbalar orqali ochiq e’lon qilinadi.
Xalqaro hamkorlik va xorijiy talabalar kontingenti to‘g‘risida ham ma’lumot berildi. Unga ko‘ra, bugungi kunda filialda Hindistondan kelgan talabalar muvaffaqiyatli tahsil olib bormoqda. Ular uchun maxsus adaptatsiya dasturlari, ingliz tilida o‘qitish guruhlari va klinik amaliyot imkoniyatlari yaratilgan. Filial nufuzli xalqaro universitetlar va klinik markazlar bilan doimiy hamkorlik olib bormoqda.
“Hindiston Milliy tibbiy komissiyasi bilan ochiq muloqotga tayyormiz”
“Toshkent davlat tibbiyot universiteti Chirchiq filiali Hindiston Milliy tibbiy komissiyasi (NMC) tomonidan bildirilgan xavotirlarni jiddiy qabul qiladi. Shu bilan birga, bu ma’lumotlar joyida o‘rganilmagan va asossiz ekani ta’kidlanadi.
Biz Hindiston bilan ta’lim sohasidagi do‘stona va samarali hamkorlikni yanada mustahkamlashdan manfaatdormiz va istalgan tekshiruv hamda muloqot uchun ochiqmiz”, deyiladi xabarda.
Izoh (0)