Joriy yil iyun oyida Markaziy bank aholining naqd puldan foydalanishi yuzasidan so‘rov o‘tkazdi. Natijalarga ko‘ra, O‘zbekiston bo‘yicha Andijon viloyatida aholi naqd puldan eng ko‘p foydalanmoqda.
Tahlil qilinishicha, Andijonda aholi kundalik tovarlarni xarid qilishda 24 foiz hisob-kitoblarni naqd pulda amalga oshiradi. Bu respublikaning boshqa hududlaridagiga qaraganda eng yuqori ko‘rsatkichdir. Shu bilan birga, Jizzax, Namangan va Samarqand viloyatlarida ham savdolarning 20 foiz tushumlari naqd pulda bo‘ladi.
Naqd valyutadan eng kam foydalanuvchilar Toshkent shahri aholisi (6 foiz) ekani qayd etilgan.
So‘rovda ishtirok etganlardan 15 foizi to‘lovlarni naqd, 33 foiz bank kartasi orqali amalga oshirishini bildirgan. Qolgan 52 foiz qatnashchi har ikkala to‘lov shaklidan ham foydalanishini aytgan.
Markaziy bank o‘rganishlariga ko‘ra, O‘zbekistonda aholi tomonidan eng ko‘p ishlatilayotgan valyuta 10 ming so‘mlik hisoblanadi.
Respondentlarning 87 foizi ish haqlarini bank kartasi orqali, 6 foizi naqd shaklda oladi. Qolgan 7 foizi esa ham naqd, ham karta orqali oylik olayotganini bildirgan.
Aholi 23 foiz jamg‘armalarini naqd pulda to‘playdi. Omonatlarining 36 foizini bankka borgan holda naqd pul shaklida joylaydi.
Avvalroq joriy yil I yarmida mamlakatda naqd pulga talab 2024-yil mos davridagidan 23 foizga oshgani xabar qilingandi. 2025-yil yanvar–iyun oylarida banklar orqali naqd pul aylanmasi hajmi 563 trln so‘mni tashkil etgan. Yarim yil davomida Markaziy bank muomalaga qo‘shimcha 5,2 trln so‘m naqd pul chiqargan.
Izoh (0)