2027-yil 1-yanvardan boshlab sanʼatkorlardan daromad solig‘i majburiy tartibda undiriladi. Bu haqda bugun, 1-aprel kuni Toshkent shahrida o‘tkazilgan matbuot anjumanida Soliq qo‘mitasi raisi birinchi o‘rinbosari Mubin Mirzayev maʼlum qildi.
Mubin Mirzayevning aytishicha, ayni paytda O‘zbekistonda sanʼatkorlardan soliq undirish mexanizmi ishlab chiqilmoqda.
Sanʼatkorlar, qo‘shiqchilar amaldagi tartib bo‘yicha deklaratsiya to‘ldirishi va o‘z daromadlarini ko‘rsatishi kerak. Shu asosda soliqqa tortilishi lozim. Tan olish kerakki, juda ko‘p sanʼatkorlar bunga rioya qilmayapti. O‘z daromadlarini to‘liq deklaratsiyalamayapti. Shu sabab ulardan soliq undirilmayapti. Hozir xufiyona iqtisodiyotga qarshi kurashish doirasida qaror loyihasini tayyorlayapmiz. Biz sanʼatkorlarga 2025 va 2026-yillarda daromadlar deklaratsiyasini to‘g‘rilab, topshirish bo‘yicha imkoniyat beramiz. Yaʼni kamchiliklari bo‘lsa, ko‘rsatib, to‘g‘rilashga yordamlashyapmiz. 2027-yil 1-yanvardan boshlab agar ular o‘z daromadlarini to‘liq ko‘rsatmasa yoki soliqlardan qochsa, biz soliq nazorati tekshiruvlari o‘tkazib, soliqlarni hisoblaymiz va undiramiz”, dedi qo‘mita maʼsuli.
Mubin Mirzayevning aytishicha, O‘zbekistonda 18 million nafardan ortiq jismoniy shaxslar daromadga ega va ularning barchasi soliq to‘lashi kerak.
Izoh (0)