Soliq mobil ilovasida salkam 11 mln odam ro‘yxatdan o‘tgani maʼlum qilindi

Joriy yil 1-may holatiga ko‘ra, Soliq mobil ilovasida 10 million 965 ming nafardan ortiq foydalanuvchi ro‘yxatdan o‘tgan. Bu haqda Soliq qo‘mitasi axborot xizmati xabar berdi.

Qo‘mita xabariga ko‘ra, ilovaning faol foydalanuvchilari 6,5 million nafardan ortiqni tashkil etmoqda. Aprel oyida ilova xizmatlaridan 115,7 million marta foydalanilgan. Sotib olingan tovar va xizmatlar chekini ro‘yxatdan o‘tkazgan fuqarolarga oy davomida 115,1 milliard so‘mlik keshbeklar berilgan.

Mart oyida 103,2 milliard so‘mdan ortiq keshbek to‘langandi. O‘shanda to‘langan keshbeklarning eng katta qismi Toshkent shahri (45 milliard so‘m) hissasiga to‘g‘ri kelgan.

Qo‘mita hisobotida qayd etilishicha, 2024-yilda isteʼmolchilarga 1 milliard dona chek uchun 1 trillion 52 million so‘mdan ortiq keshbek to‘langan. Mazkur davrda to‘langan keshbeklarning eng katta qismini Toshkent shahri aholisi olgan — 412,2 milliard so‘m. Keyingi o‘rinlarda Toshkent (107,1 milliard so‘m), Samarqand (93,2 milliard so‘m), Farg‘ona (75,6 milliard so‘m) va Andijon (52 milliard so‘m) viloyatlari qayd etilgan.

Eslatib o‘tamiz, O‘zbekistonda keshbek tizimi prezident qarori bilan 2022-yil 1-yanvardan joriy etilgan. Qarorda chakana savdo, umumiy ovqatlanish va aholiga maishiy xizmat ko‘rsatish obyektlaridagi savdolar uchun berilgan cheklar Soliq mobil ilovasida skanerlansa, xarid summasining 1 foizi fuqaroga qaytarilishi belgilangan.