Mamlakatda to‘lanmagan soliqlar miqdori 8,5 trillion so‘mga yetgan. Bu haqda bugun, 1-aprel kuni Toshkent shahrida jurnalistlar bilan o‘tkazilgan muloqotda Soliq qo‘mitasi raisi birinchi o‘rinbosari Mubin Mirzayev maʼlum qildi.
Suhbatda jurnalistlar qo‘mita vakillaridan respublikadagi soliq qarzdorligi miqdorini so‘ragan. Mubin Mirzayevning taʼkidlashicha, joriy yilda muddati o‘tagan soliqlar 10 foizdan ortmaydi.
“Bugungi kunda 8,5 trillion so‘mlik to‘lanmagan soliqlar bor. Mart oyida ilk bor bunday soliqlarni 140 milliard so‘mga kamaytirdik. To‘lanmagan soliqlar 2024-yilda bir muncha oshdi. Bugun soliq qarzdorligini undirish bo‘yicha o‘zimizga qatʼiy reja belgilab olganmiz. 2025-yilda bu qarzdorlik 10 foizdan oshirmaslik reja qilingan”, dedi qo‘mita vakili.
Soliq qo‘mitasi bergan maʼlumotlarga ko‘ra, 2025-yil 1-mart holatiga soliq qarzi 100 mln so‘mdan yuqori ishlab chiqarish korxonalari soni 978 tani tashkil etgan. Ularning jami soliq qarzdorligi 1,3 trillion so‘mdan ko‘p. Qarzlardan 385,5 milliard so‘mi (28,2 foizi) 10 ta korxona hisobiga to‘g‘ri keladi.
Shu bilan birga, soliq qarzi 100 million so‘mdan yuqori qurilish korxonalari soni 1091 ta bo‘lib, jami qarzdorlik miqdori 1,1 trillion so‘mdan ortiq. Shundan 506,1 mlrd so‘mi (42,7 foizi) soliq qarzi eng yirik bo‘lgan 10 ta korxona zimmasida.
2025-yil 1-yanvar holatiga mamlakatdagi 129 099 ta tashkilotning 441,2 ming nafardan ziyod xodimida 337,9 milliard so‘m (yer solig‘i — 210,1 milliard so‘m, mol-mulk solig‘i — 127,8 milliard so‘m) to‘lanmagan soliq qarzdorligi mavjud bo‘lgan. Shundan 62,4 milliard so‘mi byudjet, 10,3 milliard so‘mi nodavlat-notijorat va 265,2 milliard so‘mi tijorat tashkilotlari xodimlari hisobiga to‘g‘ri kelgan.
Izoh (0)