Shimoliy Koreya tomonidan uchirilgan chiqindi sharlari Janubiy Koreya prezidenti qarorgohi hududiga kelib tushdi. Bu haqda Koreya yarimoroli manbalariga tayanib, Reuters nashri xabar berdi.
Janubiy Koreya prezidentining xavfsizlik xizmati xabarni tasdiqlagan. Chorshanba kuni chiqindi sharlari prezident idorasi joylashgan majmua hududiga kelib tushgani xabar qilingan.
Dastlab xavfsizlik xizmati prezident qarorgohi joylashgan Yongsan hududi atrofida ko‘plab sharlarni aniqlashgan. Ular tartibsiz ravishda uchib qattiq qo‘riqlanuvchi muassasaga yaqinlashgan va yerga tushgan.
Harbiylar tezlikda yaqin atrofdagi xodimlarni xavfsiz hududga ko‘chirgan va sharlarni tekshira boshlagan. Tekshiruv jarayonida hech qanday zaharli yoki portlovchi moddalar, xavfli buyumlar topilmagan.
Shimol rasmiylari chiqindi sharlari uchirishdan maqsad Seulning “provokatsiyalari”ga qarshi turish ekanligini bildirgan. Janubliklar tomonidan Pxenyan nazoratidagi hududlarga K-pop videolari va dramalari yuklangan albomlar, oziq-ovqat, dori-darmon, pul va USB jamlanmalar hamda Pxenyandagi hukumatga qarshi varaqalar yuborilishi javoban Seulga chiqindi sharlari “ogohlantirish” tariqasida uchirilgani maʼlum qilingan.
Janubiy Koreya harbiylari chiqindi sharlarining bir qismi hali ham mamlakat ustida harakatlanayotganini bildirgan. Ular kuzatib borilayotgani va tez orada xavf bartaraf etilishi maʼlum qilingan.
“Hozirgi shamol yo‘nalishi g‘arbdan bo‘lganligi sababli janub tomonga uchirilgani taxmin qilingan chiqindi sharlari Kyonggi viloyatining shimoliy qismiga qarab harakatlanmoqda”, deyiladi Janubiy Koreya Shtab boshliqlari birlashgan qo‘mitasi bayonotida.
Maʼlumot o‘rnida, 2022-yildan beri Janubiy Koreyada prezident idorasi (qarorgoh va prezident ofisini o‘z ichiga oladi) Seulning markaziy tumani Yongsanda joylashgan. Amaldagi prezident Yun Suk Yol o‘nlab yillik anʼanalarni buzib, Koreya prezidentlarining anʼanaviy saroyi bo‘lgan “Moviy uy”ni tark etgan va qarorgohini poytaxt markaziga ko‘chirgan.
Izoh (0)