Samarqand viloyati hokimligi 2 dona qora rangli BYD Chazor Champion DM-i Flagship 120km avtomobilini xarid qildi. Bu davlat xaridlari portali ma’lumotlarida keltirilgan.
Shartnomalar Beni-Motors mas’uliyati cheklangan jamiyat bilan 7-oktyabr kuni tuzilgan bo‘lib, avtomobillarning umumiy narxi 630 mln so‘mni tashkil etadi.
Avtomobillarni sotib olishga viloyat hokimining 30-sentyabrdagi 261-7-0-F/24 raqamli farmoyishi asos qilib olingan.
Farmoyishda mablag‘ viloyat mahalliy byudjetining zaxira jamg‘armasi mablag‘lari hisobiga sotib olinishi belgilangan. Sotib olinishdan maqsad viloyatga tashrif buyurgan rasmiy delegatsiyalarga sifatli xizmat ko‘rsatish deb ko‘rsatilgan. Buning uchun viloyat hokimligi Ishlar boshqarmasi boshlig‘i N.Saidovning murojaati, Iqtisodiyot va moliya bosh boshqarmasining xulosasi hamda viloyat hokimining birinchi o‘rinbosari F.Abilovning bildirgisi asos qilib olingan.
“Daryo” muxbiri o‘rganish davomida ushbu farmoyish Adliya vazirligining “E-qaror” yagona elektron tizimi platformasida yashirib qo‘yilganini aniqladi.
Shuningdek, ushbu hujjat mazmunida shaxsga doir ma’lumotlar, vasiylik va homiylik yoki amaldagi qonunchilikka muvofiq boshqa turdagi foydalanishi cheklangan axborot mavjudligi ko‘rsatib o‘tilgan bo‘lsa-da, qaror matni “Shaxsga doir ma’lumotlar to‘g‘risida”gi qonunga mos kelmasligini ko‘rish mumkin.
Bu esa qonunchilikka zid hisoblanadi.
Vaholanki, “Davlat hokimiyati va boshqaruvi organlari faoliyatining ochiqligi to‘g‘risida”gi qonunning 5-moddasiga muvofiq ushbu farmoyish hokimlikning o‘z rasmiy veb-saytiga joylashtiriladigan tegishli axborot hisoblanadi. Biroq hokimlik hujjatni o‘z veb-saytida ham e’lon qilmagan.
Bundan tashqari, hokimlik shartnomani tuzishdan oldin davlat xaridlari elektron tizimida kamida bir ish kuni davomida jamoatchilik muhokamasidan o‘tkazishi lozim bo‘lsa-da, o‘tkazmagan. Shunday bo‘lsa-da, muhokama o‘tkazilgani haqida bayonnoma tuzilib, e’tiroz kelib tushmagani bildirilgan.
Shartnomalarning bittasi tuzilgan kunning o‘zida, ikkinchisi esa ikki kun o‘tib, 9-oktyabr kuni portalga joylashtirilgan. Bu esa prezidentining 2024-yil 10-iyuldagi “Davlat xaridlari tizimini takomillashtirish va unda kichik tadbirkorlik subyektlari ishtirokini rag‘batlantirish chora-tadbirlari to‘g‘risida”gi qaroriga zid hisoblanadi.
Nega yangi avtomobil xaridiga oid farmoyish yashirib qo‘yildi?
Hokimlik nima sababdan shartnoma tuzishdan oldin uni muhokamadan o‘tkazish uchun davlat xaridlari portaliga joylashtirmadi?
“Daryo” shu va mavzuga oid boshqa savollarga mas’ullardan munosabat kutib qoladi.
Ma’lumot uchun, hokimlikning 13 ta ijro hujjatlari bo‘yicha jami 1 milliard 655 million 761 ming so‘m qarzdorligi mavjudligi aniqlangan.
Izoh (0)