Farg‘ona viloyati Marg‘ilon shahrida Nexia-2 velosipedda ketayotgan 9 yoshli bolani urib yubordi. Bu haqda viloyat YHXB axborot xizmati xabar berdi.
Ma’lum qilinishicha, holat 21-sentyabr kuni soat 12:00 larda Marg‘ilon shahar Usmon Nosir va Ahmad Yassaviy ko‘chalari kesishmasida sodir bo‘lgan. Harakatlanib kelayotgan Nexia-2 haydovchisi avtomobil yo‘liga chiqqan velosipedchi — 2015-yilda tug‘ilgan M.A.ni urib yuborgan.
Natijada M.A tan jarohati olgan. Shu vaqtda M.A.ni uning otasi va haydovchi shifoxonaga olib borgan va birinchi tibbiy yordam ko‘rsatilgan.
Hozirda Marg‘ilon shahar IIB YHXB tomonidan tergovga qadar tekshiruv harakatlari olib borilmoqda.
Bundan avval Toshkentda BYD urib yuborgan 9 yoshli maktab o‘quvchisi vafot etgandi. Xuddi shu kabi holat 1-iyul kuni Navoiy viloyati Xatirchi tumanida sodir bo‘lgan. 140 km/soat tezlikda harakatlanayotgan BYD rusumidagi avtomobil tartibga solinmagan piyodalar o‘tish joyidan o‘tayotgan 9 yoshli qizaloqni bosib ketib, uning bevaqt o‘limiga sabab bo‘lgandi.
Bundan tashqari, 3-iyul kuni Samarqand tumanida Nexia-2 rusumli avtomobil yo‘lning belgilanmagan qismidan yugurib o‘tayotgan 7 yoshli bolani urib yuborgan. Ushbu hodisa oqibatida esa 2017-yilda tug‘ilgan bola ko‘rsatilgan tibbiy muolajalarga qaramasdan shifoxonada bevaqt hayotdan ko‘z yumgan.
Izoh (0)