Buxoro viloyati Qorako‘l tumanida Lacetti urib yuborgan ikki piyodadan biri vafot etdi. Bu haqda viloyat IIB xabar berdi.
Ma’lum qilinishicha, holat 2-oktyabr kuni soat 05:54 larda Buxoro viloyati Qorako‘l tumani “Eski qal’a” MFY hududidan o‘tuvchi 4R-76-sonli avtomobil yo‘lning 1-km da sodir bo‘lgan. O.M. boshqaruvida bo‘lgan Lacetti Qorako‘l tumani markazidan avtoboshbekat tomon harakatlanib borayotgan vaqtida 15-sonli IDUM to‘g‘risida joylashgan tartibga solingan piyodalar o‘tish joyidan o‘tayotgan ikki nafar piyodani urib yuborgan.
Hodisa natijasida bir nafar piyoda olgan tan jarohatlari oqibatida Qorako‘l tuman kasalxonasida vafot etgan. Ikkinchi piyoda hozirgi kunda kasalxonada davolanmoqda.
Haydovchiga nisbatan Jinoyat kodeksining 266-moddasi 2-qismi bilan jinoyat ishi qo‘zg‘atilib, qamoqqa olingan.
Bundan avval Toshkentda BYD urib yuborgan 9 yoshli maktab o‘quvchisi vafot etgandi. Xuddi shu kabi holat 1-iyul kuni Navoiy viloyati Xatirchi tumanida sodir bo‘lgan. 140 km/soat tezlikda harakatlanayotgan BYD rusumidagi avtomobil tartibga solinmagan piyodalar o‘tish joyidan o‘tayotgan 9 yoshli qizaloqni bosib ketib, uning bevaqt o‘limiga sabab bo‘lgandi.
Bundan tashqari, 3-iyul kuni Samarqand tumanida Nexia-2 rusumli avtomobil yo‘lning belgilanmagan qismidan yugurib o‘tayotgan 7 yoshli bolani urib yuborgan. Ushbu hodisa oqibatida esa 2017-yilda tug‘ilgan bola ko‘rsatilgan tibbiy muolajalarga qaramasdan shifoxonada bevaqt hayotdan ko‘z yumgan.
Shuningdek, Toshkent viloyatida Cobalt 11 yoshli maktab o‘quvchisini urib yuborgan edi.
Izoh (0)