Navoiy viloyati, Andijon viloyatining Shahrixon hamda Qashqadaryo viloyatining Dehqonobod tumanlarida haydovchilik guvohnomasini olib berishni vaʼda qilgan shaxslar ushlandi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.
Maʼlum qilinishicha, Navoiy viloyatida fuqaro B.N. fuqaro M.J.ning ishonchiga kirib, unga go‘yoki viloyat YHXBda ishlovchi tanishlari orqali 1 000 dollar evaziga “B” toifadagi haydovchilik guvohnomasini olib berishini aytgan. So‘ng 700 dollar va 4 mln so‘m olgan vaqtida ushlangan.
Shuningdek, Shahrixon tumanida “Vatanparvar” tashkilotining Andijon tumani klubi o‘rgatuvchi ustasi M.O. va “M.” MCHJ avto maktabi o‘rgatuvchi ustasi D.P. fuqaro G.A.ga haydovchilik kursini o‘qigani to‘g‘risida hujjat rasmiylashtirib berishni vaʼda qilgan. Buning evaziga 4,5 mln so‘m pulni olgan vaqtida ushlangan.
Bundan tashqari, Dehqonobod tumanida fuqaro L.R. fuqaro S.U.ga “Vatanparvar” tashkilotida ishlovchi tanishlari yordamida haydovchilik kursida o‘qigani haqida tegishli hujjat rasmiylashtirib berishni aytgan. U 7,8 mln so‘mni olgan vaqtida ushlangan.
Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.
“Prava” olib bermoqchi bo‘lgan “uddaburon”lar
Sentyabr oyida Sirdaryo viloyatining Shirin, Navoiy va Toshkent viloyatining Yangiyo‘l shaharlarida o‘quv kurslariga qatnashmasdan haydovchilik guvohnomasini olib berishni vaʼda qilgan shaxslar ushlangandi.
Oktyabrda Toshkent viloyatining Piskent hamda Ohangaron tumanlarida haydovchilik guvohnomalarini olib berishni vaʼda qilgan shaxslar ushlangan.
Noyabr oyida Samarqand va Andijon viloyatlarida soxta haydovchilik guvohnomasi rasmiylashtirib berish va sertifikat olib berish bilan bog‘liq firibgarlik holati fosh etilgandi.
Izoh (0)