O‘zbekistonda qurilish maydonlarida atmosfera havosi talablarini buzganlik uchun javobgarlik belgilash rejalashtirilmoqda.
Ekologik vaziyatni yaxshilash, atmosfera havosi ifloslanishining oldini olish, qurilish tashkilotlarining mas’uliyatini oshirishga qaratilgan qonun loyihasi Oliy Majlis Qonunchilik palatasining Ekologiya va atrof-muhitni muhofaza qilish masalalari qo‘mitasi tomonidan dastlabki tarzda ko‘rib chiqildi.
Qonun loyihasi bilan qurilish maydonlarida atmosfera havosini muhofaza qilish talablarini buzganlik uchun qurilish tashkilotlari mansabdor shaxslarining javobgarligini belgilash taklif etilmoqda.
Ushbu harakatni sodir etganlik uchun BHMning 10 baravari (3 mln 750 ming so‘m) miqdorida, huquqbuzarlik jazo qo‘llanilganidan keyin bir yil davomida takror sodir etilsa, BHMning 50 baravari (18 mln 750 ming so‘m) miqdorida jarima belgilash taklif etilmoqda.
6-fevral kuni bo‘lib o‘tgan Senatning Orolbo‘yi mintaqasini rivojlantirish masalalari va ekologiya qo‘mitasining “O‘zbekiston – 2030” strategiyasini “Yoshlar va biznesni qo‘llab-quvvatlash yili”da amalga oshirishga oid davlat dasturi loyihasi muhokamasiga bag‘ishlangan yig‘ilishda qurilish maydoniga va unga kirib-chiqish yo‘llariga suv sepadigan osma yomg‘irlatgichni o‘rnatish majburiy etib belgilash nazarda tutilayotgani aytilgandi.
Yig‘ilishda atmosfera havosiga ko‘rsatilayotgan salbiy oqibatlarni kamaytirish, atmosfera havosi ifloslanishining oldini olish, iqtisodiyot tarmoqlarining havoga chiqariladigan zararli gazlar hajmini 1,5 foizga qisqartirish, chang bo‘ronlariga qarshi kurashish va ularning oqibatlarini yumshatish masalalari muhokama qilingandi.
Izoh (0)