Ўзбекистонда қурилиш майдонларида атмосфера ҳавоси талабларини бузганлик учун жавобгарлик белгилаш режалаштирилмоқда.
Экологик вазиятни яхшилаш, атмосфера ҳавоси ифлосланишининг олдини олиш, қурилиш ташкилотларининг масъулиятини оширишга қаратилган қонун лойиҳаси Олий Мажлис Қонунчилик палатасининг Экология ва атроф-муҳитни муҳофаза қилиш масалалари қўмитаси томонидан дастлабки тарзда кўриб чиқилди.
Қонун лойиҳаси билан қурилиш майдонларида атмосфера ҳавосини муҳофаза қилиш талабларини бузганлик учун қурилиш ташкилотлари мансабдор шахсларининг жавобгарлигини белгилаш таклиф этилмоқда.
Ушбу ҳаракатни содир этганлик учун БҲМнинг 10 баравари (3 млн 750 минг сўм) миқдорида, ҳуқуқбузарлик жазо қўлланилганидан кейин бир йил давомида такрор содир этилса, БҲМнинг 50 баравари (18 млн 750 минг сўм) миқдорида жарима белгилаш таклиф этилмоқда.
6 февраль куни бўлиб ўтган Сенатнинг Оролбўйи минтақасини ривожлантириш масалалари ва экология қўмитасининг “Ўзбекистон – 2030” стратегиясини “Ёшлар ва бизнесни қўллаб-қувватлаш йили”да амалга оширишга оид давлат дастури лойиҳаси муҳокамасига бағишланган йиғилишда қурилиш майдонига ва унга кириб-чиқиш йўлларига сув сепадиган осма ёмғирлатгични ўрнатиш мажбурий этиб белгилаш назарда тутилаётгани айтилганди.
Йиғилишда атмосфера ҳавосига кўрсатилаётган салбий оқибатларни камайтириш, атмосфера ҳавоси ифлосланишининг олдини олиш, иқтисодиёт тармоқларининг ҳавога чиқариладиган зарарли газлар ҳажмини 1,5 фоизга қисқартириш, чанг бўронларига қарши курашиш ва уларнинг оқибатларини юмшатиш масалалари муҳокама қилинганди.
Изоҳ (0)