Kanadaning Galifaks shahridagi aeroport uchish-qo‘nish yo‘lagidan chiqib ketib, uning bir qismi yonib ketganidan so‘ng, aeroport vaqtincha yopildi. Bu haqda CBC telekanali xabar berdi.
Hodisa kecha 28-dekabr kuni tunda mahalliy vaqt bilan 21:30 atrofida PAL Airlines aviakompaniyasining Air Canada Express 2259 reysi bilan sodir bo‘lgan. Sent-Jondan kelgan samolyot qo‘nishda muammoga duch keldi. Yo‘lovchilarning so‘zlariga ko‘ra, samolyot shassisining g‘ildiraklaridan biri ishlamay qolgan.
“Samolyot chap tomonga taxminan 20 graduslik burchak ostida qo‘na boshladi va o‘shanda biz zarbaga o‘xshash juda baland ovozni eshitdik, chunki samolyot qanoti asfalt bo‘ylab sirpanib keta boshladi”, degan yo‘lovchilardan biri Nikki Valentayn.
Uning qo‘shimcha qilishicha, uchuvchilar samolyotning uchish-qo‘nish yo‘lagi bo‘ylab harakatlanishini to‘xtatishga uringan. “Samolyot kuchli silkindi va biz chap tomonda olov va tutun chiqayotganini ko‘rdik”, deya qo‘shimcha qildi Valentayn.
Galifaks aeroporti X ijtimoiy tarmoqda bortdagi barcha yo‘lovchilar va ekipaj a‘zolari evakuatsiya qilinganini xabar berdi. Hodisa aerodromning qisqa muddatga yopilishiga olib keldi, deya qayd etdi aeroport vakillari.
29-dekabr, yakshanba kuni mahalliy vaqt bilan soat 9:07 da Jeju Air aviakompaniyasining Boeing 737-800 yo‘lovchi samolyoti Janubiy Koreyada halokatga uchradi. Tailandning Bangkok shahridan Janubiy Koreyaning Muan shahriga uchayotgan samolyot qo‘nish vaqtida uchish-qo‘nish yo‘lagidan chiqib ketgan va panjaraga urilgan, shundan so‘ng u ikki qismga bo‘lingan va yonib ketgan. Oxirgi ma‘lumotlarga ko‘ra, 177 nafardan ortiq odam halok bo‘lgan.
25-dekabr kuni Boku-Grozniy marshruti bo‘yicha uchgan samolyot Qozog‘istonning Oqtov shahrida qulagan, oqibatda 38 nafar odam halok bo‘lgandi.
Izoh (0)