AQShning Las-Vegas shahrida joylashgan Wynn mehmonxonasida Freestyle Chess Grand Slam turniri bo‘lib o‘tmoqda. Ushbu nufuzli musobaqada o‘zbekistonlik ikki nafar shaxmatchi — Nodirbek Abdusattorov va Javohir Sindarov ham qatnashmoqda.
Musobaqasining ilk kunida har ikki sportchi ham guruh bosqichida munosib ishtirok etib, pley-off yo‘llanmasini qo‘lga kiritgan edi. 18-iyul oqshomida Freestyle Chess Grand Slam turnirining chorak final bahslariga start berildi. Unda Nodirbek Abdusattorov hindistonlik Arjun Erigaysi qarshi dona surdi, amerikalik Hans Nyeman esa Javohir Sindorovga raqiblik qildi.
Agar chorak finaldagi har ikki partiyada ham durang natija bo‘lsa, o‘yinchilar blits formatida ikki partiyadan iborat tay-brek o‘tkazadi. Agar blits partiyalar ham teng natija bilan yakunlansa, armageddon o‘yini bo‘ladi. Bu o‘yinda qora tomon uchun vaqt kamroq, lekin bahs durang bilan yakunlansa, qora tomon g‘alaba qozonadi.
Shu tariqa, birinchi partiyada Nodirbek Abdusattorov hindistonlik Arjun Erigaysi bilan durang o‘ynadi. Shuningdek, Javohir Sindarov hamda amerikalik Hans Nyeman o‘rtasidagi bahsda ham murosa yo‘li tanlandi.
G‘oliblar guruhi — 1-tur natijalari
Pragnanandha Rameshbabu — Fabiano Karuana 1:0
Levon Aronyan — Hikaru Nakamura 0:1
Nodirbek Abdusattorov — Arjun Erigaysi 0,5:0,5
Hans Nyeman — Javohir Sindorov 0,5:0,5
Mag‘lublar guruhi
Magnus Karlsen — Vidit Gujrati 1:0
Lenyer Dominges — Bibisora Assauboyeva 0,5:0,5
Rey Robson — Vinsent Keymer 0,5:0,5
Sem Sevyan — Uesli So 0:1
Nodirbek Abdusattorov va Arjun Erigaysi o‘rtasidagi javob o‘yinida g‘alaba hindistonlik shaxmatchiga nasib etdi. Endi Abdusattorov mag‘lublar guruhida g‘alaba qozongan shaxmatchiga qarshi dona suradi.
Hans Nyeman va Javohir Sindorov o‘rtasidagi javob uchrashuvi ham durang bilan yakunlangach, g‘olibni aniqlash uchun tay-brek partiyalari o‘tkazildi. Tay-brekning birinchi bahsida amerikalik shaxmatchi ustun keldi, ikkinchisida esa Sindorov javob qaytarib, hisobni tenglashtirdi.
Hal qiluvchi armageddon partiyasida Hans Nyeman zafar quchib, keyingi bosqichga yo‘l oldi.
Endi o‘zbekistonlik ikki sportchi ham musobaqadagi yurishini mag‘lublar yo‘lagida davom ettiradi. Unda Nodirbek Abdusattorovga Vinsent Keymer raqiblik qilsa, Javohir Sindorov Uesli So bilan bahslarga kirishadi.
Uchrashuvlar 18-iyuldan 19-iyulga o‘tar kechasi bo‘lib o‘tadi.
Izoh (0)