Toshkent shahrida shaxmat bo‘yicha UzChess Cup turniri bo‘lib o‘tmoqda. Musobaqaning 4-kunidan keyin o‘zbekistonlik shaxmatchilar ancha yaxshi natijalar ko‘rsatmoqda.
Tarixda ikkinchi marta o‘tkazilayotgan musobaqa Masters, Challengers va Futures guruhlarida o‘tkazilmoqda. 4-turdan keyin kuchli shaxmatchilar jam bo‘lgan Masters guruhida Nodirbek Abdusattorov yetakchilik qilmoqda. U 4 ta bahsda ishtirok etib, ikki g‘alaba hamda ikki durang qayd etgan holda umumiy 3 ochko jamg‘argan. Xuddi shuncha ochko jamg‘argan hindistonlik Rameshbabu Praggnanandhaa ikkinchi o‘rinni egallab turgan bo‘lsa, Arjun Erigaisi kuchli uchlikka yakun yasagan.
Musobaqaning Challengers guruhida ham kurash ancha qizg‘in ketmoqda. 4-turdan so‘ng gretsiyalik Nikolas Teadoru yetakchilik qilmoqda. U hozirga qadar 3,5 ochko jamg‘argan. Amerikalik Andrev Hong ikkinchi o‘rinni egallab turgan bo‘lsa, kuchli uchlikka o‘zbekistonlik Muhiddin Madaminov yakun yasagan.
Futures guruhida ham o‘zbekistonlik shaxmatchi yetakchilik qilmoqda. 4-turdan keyin 3,5 ochko jamg‘argan Ortiq Nig‘matov yaqqol peshqadamga aylanib oldi. Ikkinchi pog‘onadan turkmanistonlik Atabayev Saparmurat joy olgan bo‘lsa, 3-o‘rinda isroillik Yevgeny Alekseyev qayd etilgan.
Musobaqaning 5-tur bahslari 23-iyun, dushanba kuni bo‘lib o‘tadi.
Izoh (0)