O‘zbekistonda 2025/26-o‘quv yilidan to‘lov-kontrakt miqdori 10—12 foiz oshishi kutilayotgani haqida xabarlar tarqaldi. Oliy ta’lim, fan va innovatsiyalar vazirligi matbuot kotibi Nazokat Abduqunduzova “Daryo” so‘roviga ko‘ra bu masalaga aniqlik kiritdi.
-MYuDcGch.avif)
Kontrakt miqdori oshishi Oliy ta’lim, fan va innovatsiyalar vazirligi buxgalteriya hisobi bo‘limi boshlig‘i Qurbonnazar Ortiqovning jurnalisting kontrak haqidagi savoliga javoban “Bugungi kunda vazirlik tomonidan bu masala ko‘rib chiqilmoqda. Mutaxassislar bilan kelishilgan holda, Moliya vazirligi bilan kelishilgan holda rahbariyatga taklif tayyorlash ustida ish olib borilyapti. Qisman oshishi mumkin, miqdori to‘g‘risida hozir bir narsa deyolmaymiz, lekin shu ustida tahlillar olib borildi”, degani aks etgan video tarqalganidan so‘ng keng muhokama qilinmoqda.
“Ijtimoiy tarmoqlarda tarqalgan xabarlarga oydinlik kiritib shuni ta’kidlaymizki, 2025/26-o‘quv yili uchun oliy ta’lim muassasalarida to‘lanadigan shartnoma (kontrakt) to‘lovlarining yakuniy miqdori hali tasdiqlanmagan”, dedi Nazokat Abduqunduzova “Daryo” so‘roviga javoban.
Uning bildirishicha, mazkur masala bo‘yicha barcha ma’lumotlar vazirlikning rasmiy axborot kanallari orqali e’lon qilinadi.
2024-yilning iyul oyi oxirida 2024/25-o‘quv yili uchun to‘lov-kontrakt miqdorlari tasdiqlangandi. Kontrakt miqdori o‘tgan o‘quv yiliga nisbatan 15 foizga oshgan. Avgust oyida esa superkontrakt miqdorlari tasdiqlangandi. 2023/24-o‘quv yilida to‘lov-kontrakt miqdorlari undan avvalgi o‘quv yili uchun belgilangan miqdorlarda o‘zgarishsiz qolgandi.
Izoh (0)